Protokolli, të pakënaqur edhe hotelierët! Inspektorati: Ankesa ka edhe te ne, mund të propozojmë ndryshime

Definimi i katër klientëve familjarë në një tavolinë me katër karrige në kafene ka ngjallur pakënaqësi edhe te hotelierët, pasi ata në terren nuk mund ta kontrollojnë këtë gjë.

Disa prej tyre prapa kamerës së TV21 thonë se nuk mund t’ua kërkojnë letërnjoftimin klientëve për t’i legjitimuar, pasi këtë gjë mund ta bëjnë vetëm policët. Por dhjetëra hotelierë nga Kërçova kërkesë për ndryshim të protokollit kanë dërguar edhe te Inspektorati i Tregut.

Kërkesa e hotelierëve të Kërçovës:
“Sipas vendimeve të fundit të Qeverisë për nisjen me punë të objekteve hotelerike, kafenetë në Kërçovë i kanë hapur objektet e tyre duke respektuar ligjet dhe rekomandimet. Megjithatë, disa prej tyre ishin të pamundura për t’u realizuar – në një tavolinë me katër karrige mund të shërbehen katër persona nëse janë të një familje. Me këtë pikë ne nuk jemi të obliguar që t’u kërkojmë legjitimim personave që janë në tavolinë, pasi ua cenojmë privatësinë e cila është e garantuar me ligj”.

E pyetëm Inspektoratin e Tregut se nëse kjo kërkesë ka arritur deri te ata dhe si do të veprojnë. Një gjë e tillë ende nuk ka arritur te ata. Në rast se arrin edhe kërkesa e hotelierëve të Kërçovës dhe vërehen edhe ankesa edhe nga të tjerë, ata do të kërkojnë nga Komisioni për Sëmundje ngjitëse që ndryshojnë këtë pikë.

Inspektorati i Tregut:
“Ne do të dorëzojmë propozim deri te Komisioni nga vështirësitë që i hasim në terren, por sërish fjalën e fundit e ka Komisioni dhe Qeveria. Ne nuk miratojmë, ne vetëm realizojmë dhe kryejmë kontroll. Ne nuk realizojmë ndryshime të asnjë rregullore. Nëse arrin një dokument i tillë, ne do ta përcjellim deri te Komisioni për Sëmundje Ngjitëse“.

Me vështirësitë është i njoftuar edhe kryeministri teknik, Oliver Spasovski. Ai madje tha se që në momentin që u sjell vendimi për rihapjen e kafeneve, e ka ditur se protokolli në terren nuk do të respektohet as nga hotelierët e as nga qytetarët. Megjithatë shtoi se nëse vazhdon që protokolli të mos funksionojë në terren, i njëjti do të ndryshojë.

“Nëse kemi jofunksionim  në ndonjë segment të atij protokolli për realizim dhe kështu me radhë, duhet të ndryshohet,  megjithatë pjesa më e madhe nga objektet hotelerike nuk i respektojnë protokollet dhe këtë nuk e bëjnë as qytetarët. Do të thotë ajo fotografi që shihet nga objektet hotelerike, qysh në ditën e parë u pa se shumë prej tyre kanë vazhduar me punë edhe pas orës 22”, tha Oliver Spasovski, kryeministër teknik.

Hotelierët kanë ankesa edhe për rregullin që me punë duhet të fillojnë vetëm ata të cilët kanë verandë të hapur në tre anë dhe se në një tavolinë mund të shërbehen vetëm dy persona.