Hetimet për eskalimin e protestës për “Monstrën” ende vazhdojnë, e më këtë rritet edhe numri i të arrestuarve dhe atyre që iu është shqiptuar masa e paraburgimit. Zëdhënësi i MPB-së, Toni Angellovski, thotë se punohet ende në zbardhjen e tërësishme të rastit dhe po analizohen video-incizimet e protestës, duke shtuar se me këtë do të ketë edhe arrestime të tjera.
“Po veprojmë ende, po punohet sipas atyre informacioneve që i kemi. Po shihen edhe video-incizimet dhe po ndërmerren të gjitha masat e nevojshme operative që të zbardhet rasti dhe nëse gjatë periudhës në vijim do të detektohen persona të tjerë që kanë bërë vepër penale edhe për ata do të ketë padi penale”, deklaroi Toni Angellovski – zëdhënës i MPB-së.
Njëri nga organizatorët e protestës, Blerim Ahmedi, sot ishte në bisedë informative në polici. Ai thotë se provokimi ka filluar nga ana e policisë dhe nga protestuesit e për këtë do të kërkojnë përgjegjësi nga organizatat për të drejtat e njeriut.
“Thjeshtë bisedë informative se si ka rrjedhur çështja e protestës, eskalimi i situatës, rregullat dhe rekomandimet e OBSH-së. D.m.th ne ishim gjithçka në rregull, i respektuam të gjitha rregullat. Më pastaj se si janë afruar njerëzit me maska apo pa maska, ne nuk mbajmë përgjegjësi. 01.18 Faktikisht ne do të kërkojmë përgjegjësi edhe nga organizatat për të drejtat e njeriut sepse provokimi filloi nga ana e policisë”, u shpreh Blerim Ahmeti – organizator i protestës.
Deri tani janë arrestuar 12 persona, ndërsa për 5 prej tyre prokuroria ka kërkuar paraburgim. Edhe pse në video-incizimet shihet qartë se edhe policët hidhnin gurë kundrejt protestuesve, deri në këto momente nuk është nisur ndonjë procedurë disiplinore ndaj tyre. Nga MPB thonë se ende po shqyrtohet rasti i policëve për të parë nëse kanë kryer sjellje joprofesonale gjatë kryerjes së detyrës zyrtare. Arrestimet dhe paraburgimet po bëhen për shkak se protesta për “Monstrën” eskaloi, pasi kordoni policor pengoi marshin protestues, e ndërkaq këta të fundit në shenjë revolte sulmuan policë me gurë dhe shufra metalike.