Pa distancë fizike, disa me maska e disa të tjerë jo, ishte pamja e protestës së djeshme për rastin “Monstra”. Të pranishëm në protesta ishin edhe deputetët e koalicionit Aleanca për Shqiptarët dhe Alternativa. Duke qenë se masat anticovid janë ende në fuqi, TV21 i pyeti deputetët e ASH-AAA-së, se a janë respektuar mjaftueshëm masat anticovid. Elmi Aziri nga ASH tha se masat u respektuan aq sa janë respektuar në protesta të tjera.
“Me aq sa pamë qytetarët ishin me maska! Respektimi i masave ishte i njëjtë sikur në protestat e tjera që janë organizuar në kohë pandemie në RMV”, pohoi Elmi Aziri, deputet i ASH-së.
Halil Snopçe nga ASH pohoi se çështja me virusin në vendin tonë po banalizohet. Protokolle kemi sa të duash, dhe asgjë nuk zbatohet njësoj si ligjet e këtij shteti, shtoi ai.
“Masat anticovid nuk respektohen në parlament, e lëre më në një protestë qytetare. Në parlament kemi mbledhje komisionesh ku në një hapësirë të vogël marrin pjesë 30-40 deputetë. Kur opozita jep vërejtjen se nuk ka kushte injorohet nga shumica. Masat anticovid nuk respektohen para sporteleve, përpara bankave, mos flasim për kafenetë dhe restorantet te cilët janë te stërmbushur dhe pa asnjë masë. Ne ketë vijë edhe protesta ishte në te njëjtën përmasë sikurse radhët para sporteleve dhe rrëmujat qe krijohen para kafeneve”, pohoi Halil Snopçe, deputet i ASH-së.
Skender Rexhepi tha se dalja e tij në protesta ka qenë si qytetar dhe jo si deputet.
“Unë në protestë isha si qytetar bashkë me miq dhe familjarë të mi, e jo si deputet apo organizator dhe gjatë gjithë protestës kemi qenë krejt në fund dhe i kemi respektuar masat antikovid, dalja ime dhe e shokëve përpara ishte në cilësi të qetësimit të tensionit”, tha Skender Rexhepi, deputet i Alternativës.
Nga MPB thonë se nga protesta u dëmtua dera e Ministrisë së Punëve të Jashtme, 4 makina të MPB-së, si dhe dëme të tjera, nga ku shtuan se pas marrjes së video-incizimeve nga kamerat në rrugë do të sanksionohen të gjithë prishësit e rendit dhe qetësisë.
Në kohë pandemie në vendin tonë disa herë me radhë janë organizuar protesta të ndryshme nga qytetarë, parti politike si dhe tubime të ndryshme fetare.