Propozohet heqja e testeve PCR me rajonin, Zaev: Udhëtime pa PCR po, por vetëm kur është më se e domosdoshme

Komisioni i Sëmundjeve Ngjitëse i ka propozuar Qeverisë për të hapur kufijtë pa teste PCR me Shqipërinë, Kosovën, Malin e Zi  dhe Serbinë.

 “Sipas analizës, për momentin nuk ka asnjë indikacion, d.m.th nuk ka një numër të lartë të rasteve të importuara në vend me COVID-19 nga këto vende. Prandaj, nuk ka rrezik dhe është e sigurt hapja e kufijve. Propozim vendimi do t’i dorëzohet Qeverisë së Republikës së Maqedonisë Veriore”, thonë nga Ministria e Shëndetësisë.

Po çfarë vendimi mund të pritet nga Qeveria, kur tashmë disa ditë është marrë vesh se mes ministrave ka debat për këtë çështje, sidomos rreth heqjes së nevojës për test PCR për hyrje-dalje me Kosovën.

Vendimi do të sillet nesër, paralajmëron Kryeministri Zoran Zaev.

 “Me shumë gjasa do të sjellim vendim të Qeverisë. Debati është cilësor. Të gjithë thonë, “aha të kemi kujdes për këtë”, “është ok, do të ndihmojë edhe ekonomikisht, por nëse kemi kujdes edhe për atë…”, andaj të gjithë jemi të frikësuar për numrat që rriten, jo tek ne, në gjithë botën, në rajon dhe gjithë Evropën e përskaj kësaj duam t’i respektojmë profesionistët siç është Komisioni i Shëndetësisë”, deklaroi Zoran Zaev – Kryeministër i RMV-së.

Kryeministri thotë se janë pozitiv rreth kësaj çështjeje, ndërsa përgjigje zyrtare po pritet nga Serbia dhe Bullgaria. Shton se nuk ka dëshirë që të jemi të izoluar nga rajoni, si në aspektin e shëndetësisë, por ashtu edhe atë ekonomik.

 “Përgjithësisht jemi pozitivë kur vetë profesionistët nga Komisioni Shëndetësor japin sugjerime, por duhet të theksoj se ato sugjerime do të jenë: Po udhëtime pa PCR, por vetëm kur është më se e domosdoshme”, u shpreh kryeministri Zoran Zaev.

Se çka do të llogaritet domosdoshmëri e çka jo, mbetet për t’u parë nga vendimi që do të sjellë Qeveria. TV21 u përpoq nga burime të institucioneve shëndetësore të kuptojë nëse do të ketë kushte të veçanta për të kaluar kufirin pa test PCR, por askush nuk mundte të jepte informacione, duke thënë se ende nuk është definuar asgjë.