Problemi i shtetësisë drejt zgjidhjes! Sela, Gashi dhe Zaev të kënaqur nga takimi

Në takimin për të gjetur zgjidhje për shtetësinë Zaev shkoi i pari, ndërsa priti në këmbë dy liderët e tjerë, Selën dhe Gashin. Të dy palët kishin shkuar të përgatitur me propozimet e tyre, e në bazë të kësaj arritën në një marrëveshje. Deri në fund të javës të përgatitet një tekst ligjor për ligjin për shtetësi, ndërsa javën tjetër ligji të gjendet në Kuvend.

 “Bëhet fjalë për rreth 13 arsye bazë për marrjen e shtetësisë, jo si tërësi por cilado qoftë nga ato kushte dhe kjo nënkupton një hap serioz, sepse pothuajse të gjithë qytetarët e plotësojnë të paktën njërin nga kushtet. Por, sigurisht, këtu bëjnë pjesë edhe vitet e pritjes për shtetësi, vlerësimi që jep Agjencia për Siguri Kombëtare, etj”, tha kryeministri Zoran Zaev.

Asnjëri nga liderët nuk i bëri të ditur detajet mbi ligjin, por vetëm thanë se do të jetë një zgjidhje ligjore e pranueshme për të gjitha palët.

 “Po, do të ofrohet një zgjidhje e cila përsëri do të ngelet objekt i takimit të radhës që të shndërrohet në tekst, në të cilën do të jenë të parapara disa dëshmi, mes të cilave mund të jetë një dëftesë, faturë energjie elektrike, etj. Janë një numër i madh dëshmish prej të cilave mjafton që të plotësohet vetëm njëra dhe me automatizëm këtyre qytetarëve do të duhet t’u konstatohet shtetësia”, u shpreh kryetari i Aleancës për Shqiptarët, Ziadin Sela.

Nga ana tjetër kryetari i Alternativës, Afrim Gashi bëri thirrje që opozita maqedonase të zhbllokojë ligjin e tyre shtetësi.

 “Po shfrytëzoj rastin këtu t’i bëj ftesë edhe opozitës maqedonase që t’i heqin amendamentet të ligji për shtetësi dhe ne bashkërisht ta zhbllokojmë Kuvendin dhe të kërkojmë zgjidhje për problemet e tjera të qytetarëve”, potencoi kryetari i Alternativës, Afrim Gashi.

Koordinatori i grupit parlamentar të BDI-së Arbër Ademi, tha se shpresojnë në gjetjen e një zgjidhje të përbashkët për çështjen e shtetësisë.

 “Unë bëj thirrje për qasje racionale dhe serioze, ashtu siç i ka hije partive politike shqiptare. Besoj se do të shoshiten të gjitha argumentet dhe do të arrijmë te zgjidhja e përbashkët që në instancë të fundit ka për qëllim zgjidhjen e kësaj çështjeje”, deklaroi Arbër Ademi – deputet i BDI-së.

Pas marrëveshjes Zaev, është shprehur optimist që do të zhbllokohet Kuvendi, ndërsa opozita shqiptare do të zhbllokojë Kuvendin nëse opozita maqedonase i tërheq amendamentet për Ligjin për shtetësi.