Prindërit me fëmijë 10 vjeçar dhe të sëmurët kronik, Filipçe: Do ta diskutojmë rikthimin e tyre në punë

Rihapja e çerdheve dhe shkollave ka nxjerrë në pah edhe një problem. Çfarë do të ndodh me edukatoret dhe mësueset që kanë fëmijë deri në moshën 10-vjeçare dhe që me vendimin të Qeverisë janë të liruar nga puna?

Masa do të qëndrojë në fuqi edhe më tej, edhe përskaj paralajmërimeve se në çerdhe mungon kuadër edukativ.

“Gati një numër i madh janë me fëmijë të vegjël. Tash po presim miratimin e ligjit që të dihet saktë se a kthehen ose jo të gjithë apo mbeten sipas protokollit”, deklaruan nga çerdhja “Fidani”
“Prindërit që e shfrytëzojnë masën për t’u kujdesur për fëmijët prej 0 deri në 10 vjeç, vazhdojnë edhe më tej ta shfrytëzojnë këtë masë. Kjo masë nuk është shfuqizuar”, tha ministrja e Punës dhe Politikës Sociale, Jagoda Shahpaska.

Ky problem nuk është aq evident në shkolla fillore, pasi ende po realizohet anketa se në çfarë duan prindërit që fëmija i tyre ta ndjek mësimin, me prani fizike apo online. Në shkollën fillore “25 maji” vetëm një i punësuar ka fëmijë të moshës parashkollore.

“Vetëm një i punësuar e ka fëmijën që duhet ta dërgojë në çerdhe. Por, besoj edhe ajo nuk do të ketë pengesë që të vijë në punë për shkak se edhe ashtu çerdhet hapen më 9 shtator”, deklaroi drejtori i “25 Majit”, Fadil Murtezani.

Mungesa e kuadrit mund të shkaktohet edhe nga një masë tjetër, sepse nga puna të liruar janë edhe të sëmurët kronikë. Shkollat ende nuk kanë një numër se sa mësues janë të sëmurë kronikë dhe duhet të rikthehen në punë për të ligjëruar me prani fizike, pasi ende është në rrjedhë anketa.

“Nuk e dimë numrin e saktë. Deri tash s’janë paraqitur, për shkak se ende po realizohet anketa për prindërit se në çfarë forme duan ta realizojnë mësimin, online apo në prani fizike”, deklaroi drejtoresha e shkollës “Ismail Qemali”, Burbuqe Imeri.

Nga Sindikata e Arsimit, Shkencës dhe Kulturës dje propozuan rokadë mes mësuesve. Ata që janë me prani fizike dhe janë të sëmurë, të ligjërojnë mësim online. Ndërkohë autoritet shëndetësore japin këtë zgjidhje.

“Hapet mundësia që ose në nivel të një shkolle të ketë mësim të kombinuar ose në kuadër të një komune”, deklaruan nga Jakim Nedelkov

“Ai vendim ishte për prindërit që kanë fëmijë sepse u mbyllën çerdhet dhe shkollat. Përfshirë këtu edhe njerëzit që janë të sëmurë kronikë sepse ende vlen masa. Ditëve në vijim do të hapim diskutim në Komisionin për Sëmundje Ngjitëse sipas vlerësimit të rrezikut të situatës aktuale te epidemisë”, tha në intervistë për TV21, ministri i Shëndetësisë, Venko Filipçe.

Për shkak të masave anti Kovid Qeveria në mars i liroi nga puna prindërit që kanë fëmijë deri në moshën 10-vjeçare dhe të sëmurët kronikë. Prindërit u liruan nga puna, për shkak se shkollat dhe çerdhet u mbyllën për të parandaluar shpërndarjen e virusit Kovid-19.