Edhe raundi i dytë për zgjedhjen e presidentit në Shqipëri është djegur, pasi nuk kishte asnjë propozim nga opozita.
Komisioni i Ligjeve i mbledhur paraditen e sotme zgjati vetëm pak minuta dhe u mbyll pas konstatimit se nuk kishte asnjë kandidaturë nga opozita për emrin e presidentit dhe njoftoi se mbledhja tjetër do të bëhet e ditur pas vendimit të Konferencës së Kryetarëve.
Ndonëse në mes javë palët u dakordësuan për t’i lënë opozitës të drejtën për të propozuar e para kandidatin, marrëveshja nuk shkoi si duhet, pasi kreu i grupit parlamentar të PD Enkelejd Alibeaj, akuzoi socialistët për prishje të saj.
Kujtojmë se raundi i parë për zgjedhjen e presidentit u ezaurua më 16 maj pa kandidatë zyrtarë, pasi grupet parlamentare në Kuvendin e Shqipërisë nuk dorëzuan kandidatura.
Sipas Kushtetutës së Shqipërisë, kandidati për president i propozohet Kuvendit nga një grup prej jo më pak se 20 deputetësh.
Për zgjedhjen e presidentit të vendit, Kuvendi zhvillon deri në pesë votime (raunde). Presidenti zgjidhet në votimin e parë, të dytë ose të tretë kur një kandidat merr jo më pak se tri të pestat e votave (84 vota) të të gjithë anëtarëve të Kuvendit, ndërsa Kuvendi i Shqipërisë ka 140 deputetë.
Në votimin e katërt dhe të pestë zgjidhet president kandidati që siguron më shumë se gjysmën e votave të të gjithë anëtarëve të Kuvendit. Votimi i pestë zhvillohet kur në votimin e katërt asnjë kandidat nuk ka siguruar shumicën e kërkuar të votave.