Ka shumë kompani të cilat edhe përkundër kontrolleve të shtuara të Drejtorisë së të Ardhurave Publike, kanë marrë ndihmë nga shteti, kurse nuk ua kanë paguar rrogat të punësuarve të tyre. Pas informacionit të drejtoreshës së DAP-it për gjendjen e tillë, në opinion publik lindi pyetja – si është e mundur të ketë keqpërdorime dhe ku ngec sistemi? Keqpërdorim ka, pajtohet Sanja Lukarevska.
“Po, ka ende punëdhënës të cilët, edhe pas të gjitha njoftimeve publike vazhdojnë ta keqpërdorin sistemin. Lista e fundit e Sekretariatit të Përgjithshëm është dorëzuar në PPTH. Kjo listë do t’i dorëzohet Prokurorisë Publike menjëherë pas njoftimit. Atje, siç jemi informuar, të gjithë janë në një procedurë parahetimore”, deklaroi Sanja Llukarevska – Drejtoreshë e Drejtorisë për të Ardhura Publike.
Duhet të ketë përgjegjësi penale, theksoi Lukarevska. Ajo shton se në këtë rast bëhet fjalë për keqpërdorim të ndihmës shtetërore nga, siç i quajti, punëdhënës të papërgjegjshëm.
“596 punëdhënës morën mbështetje financiare në vlerë prej 36.655.907 denarëve dhe nuk e paguan pagën për muajin nëntor ndaj .421 të punësuarve. Në bazë të gjendjes, deri më 31.12 ky numër u ul në 245 punëdhënës të cilët morën mbështetje financiare për nëntor 2020 në vlerë prej 12.208.833 denarëve”, potencoi Sanja Llukarevska – Drejtoreshë e Drejtorisë për të Ardhura Publike.
Për këta 245 punëdhënës, siç shpjegoi Lukarevska, tashmë janë përgatitur paralajmërime për mospagim të rrogës. Për ta, nëse pas paralajmërimit nuk ua paguajnë pagën punëtorëve, brenda një jave do të vijojë pagesë e detyrueshme duke i bllokuar mjetet financiare në llogaritë e tyre të transaksionit dhe paratë do të transferohen në xhirollogaritë e të punësuarve. Ende ka kompani që nuk kanë paguar pagën për një ose për tre muaj, informon Lukarevska. Të tilla janë 125 kompani. Për këta punëdhënës, siç tha ajo, tashmë janë dorëzuar të dhëna të hollësishme në Prokurorinë Publike për ngritje të një procedure penale. Paralajmërim për mosdhënien e rrogës për nëntor u është dërguar edhe 351 punëdhënësve të tjerë te të cilët është bërë pagesë e detyrueshme. Sipas njohurive të fundit nga DAP-i, shumica e kompanive me detyrime të papaguara ndaj punëtorëve janë nga Shkupi – 73 kompani, 21 nga Tetova dhe 10 punëdhënës të cilët nuk e kanë paguar ndihmën shtetërore që e kanë marrë janë nga Gostivari.