Shumica reflekton pas “kërcënimit” të opozitës shqiptare për bllokim! Pr/ligji për shtetësinë të premten në Komision

TË FUNDIT

Paralajmërimi i opozitës shqiptare për bllokim të Kuvendit nëse projektligji i tyre për shtetësinë nuk futet në rend dite të komisionit amë, me sa duket ka bërë shumicën të reflektojë. Shefi i grupit parlamentar, Skender Rexhepi, tregon se të premten teksti do të gjendet para komisionit për mbrojtje dhe siguri.

 “U arrit përmes takimit me përgjegjësit në kuadër të komisioneve të kuvendit që definitvisht ligji për shtetësinë të futet në rend dite në komisionin për mbrojtje, ai do të jetë ditën e premte”, tha Skender Rexhepi – shef i grupit parlamentar ASH-AAA.

Por mbeten dallimet mes pushtetit dhe opozitës shqiptare për këtë projektligj. Kryeministri Zoran Zaev ripërsërit se patjetër duhet të ketë një dokument si dëshmi që dikush ka lindur e jetuar në Maqedoninë e Veriut. Propozimin e Aleancës e Alternativës që kjo të mund të bëhet me 3 dëshmitarë për Zaevin është e papranueshme, sepse siç thotë, dëshmitarët janë për martesë, kurse për marrjen e shtetësisë duhet të paktën një dokument.

 “E kemi patjetër që këto punë t’i zgjidhim sipas standardeve ndërkombëtare. Vullneti ekziston. Po të ishte për mua, pse 3 dëshmitarë, le të jetë 1, po nuk është zgjidhje për qytetarët. Sot mund të japim dokument, nesër dikush mund ta kontestojë. Dërgoj mesazh të ulemi së bashku. Zgjidhja përfundimtare le të jetë e opozitës, shumica do ta votojë, sepse ja ata e nisën”, deklaroi kryeministri Zaev. 

Rexhepi thotë se do të dëshironte t’i besonte këto fjalë, por rikujton se shpesh Zaev premtimet publike di edhe t’i ndryshojë.

 “Ai jep deklarata publike, ndërsa ato duhet t’i shohim në fushën e amendamenteve. Ne jemi t; gatshëm për kompromis. Tre dëshmitarë është pjesë e propozimit tonë dhe gjithsesi është pjesë që ne e kemi propozuar dhe nëse një dëshmitar i duhet atij për dasma, e 3 nuk i mjaftojnë për punën e shtetësisë, a ka harruar Kryeministri që me 1 dëshmitar janë shkatërruar 13 jetë në rastin Sopot, me 1 dëshmitar janë shkatërruar 6 jetë në rastin e Monstrës dhe atë ka qenë dëshmitar i fshehur”, shtoi Skender Rexhepi – shef i grupit parlamentar ASH-AAA.

Kryeministri apeloi sot për bashkëpunim mes grupeve të punës që të gjendet zgjidhja. Ai dëkon që dokumente si dëftesa shkollore ose shtetësia e një prindi që ka lindur këtu, të vlejnë si dëshmi që dikush të tregojë se është banor i shtetit. Shefi i opozitës shqiptare në Kuvend ndërkaq thotë se janë të gatshëm për kompromis për çdo pikë që është në propozim ligj, nëse ai kompromis e mbron të drejtën e qytetarit për marrjen e shtetësisë.

TË NGJAJSHME