Pianistja Anila Aliu shkëlqen në Meksikës! Dirigjenti Vazquez: E mrekullueshme të njohësh Kosovën përmes punës së saj

Pianistja nga Kosova Anila Aliu në një intervistë ekskluzive për TV21 thotë se për të është një mundësi unike që të performoj në Meksike. Ajo i tha TV21 se është e lumtur që ka arritur të depërtoj në një shtet që nuk e njeh Kosovën si shtet të pavarur.

“Fal performancave të mia nëpër Evropë, dirigjenti i Filarmonisë meksikane ka arritur të më dëgjojë dhe të bëjë përzgjedhjen që unë të jem soliste në këtë sezonë në turneun në Meksikë. Është sukses i madh, jo vetëm për mua, por për të gjithë shqiptarët, sepse ka qenë një prezantim fantastik i kulturës tonë. Nuk mund ta shpjegoj me fjalë se sa mirë jam pritur nga publiku meksikan. Kam marrë komente pozitive, por edhe kritika shumë të mira. E sa i përket asaj se sa e suksesshme ka rezultuar vizita ime këtu, i vë vulën ftesa e ardhshme për sezonin e ardhshëm shtator 2023. Gëzohem të ndaj me ju lajmin se jam e ftuar përsëri për një turne edhe më të madh, në qytete të tjera të ndryshme të Meksikës”, u shpreh pianistja Anila Aliu për TV21.

Ndërkaq për TV21 u prononcua edhe Jorge Vazquez, dirigjent dhe drejtor i orkestrës “Filarmonia” nga ku i është bërë ftesa Anilës.

“Janë shumë arsye përse e kemi ftuar Anilën për të performuar në Meksikë me Filarmoninë. Ne jemi takuar diku në Europë, e dëgjova atë duke performuar dhe hodha një sy mbi materialet e saja në rrjete sociale dhe shkova për ta njohur atë. Ajo është një njeri i mrekullueshëm por më e rëndësishmja ajo është një artiste e mrekullueshme, një pianist shumë e aftë dhe mua si dirigjent menjëherë më bëri për vete me talentin e saj, me tingujt që ajo krijon në piano. Gjithashtu nga momenti i parë në prova, mua dhe orkestrën na bëri për vete me nivelin e saj dhe intelektit të lartë të të kuptuarit të muzikës së Ravel. Ai është një kompozitor shumë i komplikuar, mund të tringëlloj  shumë i thjeshtë, por gjuha në aspektin fondamental është shumë komplekse. Ajo (Anila) e bën atë shumë të thjeshtë dhe mrekullueshëm. Për këtë orkestra ishte shumë e gëzuar dhe menjëherë më thanë që Anilën duhet ta marrim përsëri sa më shpejtë që të jetë e mundur. Gjithashtu publiku në koncerte e dashuroi atë shumë, kështu që ne shpresojmë që ky bashkëpunim i parë të sjell edhe shumë bashkëpunime të tjera më pas. Te pasurit mundësinë për të njohur Kosovën përmes syve dhe fjalëve të Anilës, ishte e mrekullueshme këtë javë. Na ka bërë për vete shumë kjo gjë. Sigurisht dera është e hapur gjithashtu edhe për artistë tjerë të Evropës për bashkëpunim, e në veçanti artistët nga Kosova. Ne do ishim shumë të gëzuar të krijonim urë lidhëse duke krijuar muzikë të vërtetë dhe artistë të vërtetë. Unë e di që ne jemi shumë larg me mijëra kilometra, por unë besoj që muzika  është më e fuqishme se sa çdo sfidë dhe çdo distancë. Kjo duhet të jetë bashkëpunimi i parë nga shumë bashkëpunime që do pasojnë në të ardhmen. Ishte vërtet nder që në vendin tonë të kishim një artiste të mrekullueshme e cila vjen nga vendi juaj”, tha Jorge Vazquez, dirigjent dhe drejtor i orkestrës “Filarmonia”.

Kujtojmë se pianistja Anila Aliu numëron shumë çmime të vendeve të para në gara ndërkombëtare nëpër botë, si Zvicra, Gjermania, Austria, Bangkog (Tajlandë), në New York të ShBA, e shumë e shumë vende të tjera.