Kandidatët për kryetarë të Vrapçishtit mbrëmë në debatet zgjedhore të TV21 treguan për planet e tyre 4-vjeçare nëse vijnë në krye të komunës. Nebi Rexhepi nga BDI premtoi ndërtimin e poliklinikës në Vrapçisht.
“Në 4 vitet e ardhshme ne jo vetëm që do ta bëjmë poliklinikën, por do ta bëjmë edhe restaurimin dhe zgjerimin e gamës së shërbimeve edhe të ambulancës që ndodhet në fshatin Gradec”, tha Nebi Rexhepi, kandidat i BDI-së.
E Senad Ameti nga Lëvizja Besa premtoi ambulancën komunale.
“Duke marrë parasysh që ne tani jemi edhe pjesë e pushtetit qendror, do të kërkojmë që urgjentisht të ndahen mjete për ndërtimin e një ambulance komunale në territorin e Komunës së Vrapçishtit e cila do të japë shërbime 24 orë pa ndërprerje”, deklaroi Senad Ameti, kandidat i Lëvizjes BESA.
Kryetari aktual, Isen Shabani, nga radhët e Aleancës-Alternativës, i cili po kandidon për mandatin e dytë, u tha dy kundërkandidatëve se poliklinika nuk mund të realizohet dhe të mos merrem me projekte “3D”. Tregoi për projektet e tij nëse merr edhe një mandat.
“Fokus më tepër kemi në projektet për rikonstruksion të deponive, projekt rajon për deponinë, projekt për parqet me qëllim socializmin e fëmijëve me nevoja të posaçme, projekt për tamponim të rrugëve ndihmëse në autostradë, projekt për planet urbanistike jashtë vendbanimeve”, u shpreh Isen Shabani, kandidat i ASh-AAA.
Shabani tha se gjatë katër viteve sa ka menaxhuar me Vrapçishtin ka pasur rritje të investimeve, që sipas, kapin vlerën e mbi 9 milionë eurove investime kapitale.