Për qëllime humanitare, organizohet panair i librit online “iPanairi”

Këte vit, për herë të parë në Maqedoninë e Veriut organizohet panair i librit online i cili realizohet nëpërmjet aplikacionit “iPanairi”.

Panairi do të realizohet nga kompania e softuerit REX Solution në bashkëpunim me Lidhjen e Botuesve Shqiptarë.

Kjo platformë ju dedikohet të gjithë lexuesve të Maqedonisë së Veriut, të cilët do të kenë mundësi të zgjedhin titujt e tyre të preferuar nga autorë shqiptarë dhe të huaj, duke shkarkuar aplikacionin “iPanairi” në telefonat e tyre celularë.

“Për shkak të situatës së pandemisë globale me virusin Covid-19, të gjitha aktivitetet kulturore në vendin tonë janë të pezulluara. Në këto kohë të vështira ku libri dhe dija janë mjetet më të fuqishme për ti kapërcyer pengesat e shkaktuara nga pandemia që ka tronditur botën, janë krijuar të gjitha kushtet për të pasur një panair online të librit që mund të sfidojë shumë pamundësi dhe ta bëjë leximin e librit aktivitetin më të dashur të të gjitha grupmoshave të lexuesve shqiptarë”, thuhet në njoftimin e realizuesve.

Porosia në platformë do të mund të bëhet përmes aplikacionit “iPanairi”.

Librat e porositur do të dërgohen falas në adresat e porositësve dhe pagesa do të bëhet në momentin e pranimit të porosisë, ndërkaq mjetet që do të grumbullohen, do t’ua dedikojnë fëmijëve me nevoja./TV21