Pendarovski: Ndryshimet në KP nuk e kthejnë Gruevskin/ Mickoski nuk flet, nga BDI mohojnë se kanë marrë USB

Ndryshimet në Kodin Penal nuk e lejojnë Nikolla Gruevskin të kthehet në vend, thotë presidenti i shtetit, Stevo Pendarovski, në intervistë për Zërin e Amerikës në gjuhën maqedonase. Mirëpo, ai nuk mund të konfirmojë se me ndryshimet në Kodin penal ka mundësi që Gruevski, nëse kthehet në vend, të përballet sërish me drejtësinë, kjo, thotë Pendarovski, është çështje e gjyqësorit.

“Nuk është amnisti. Shikoni, nëse është amnisti, le të mendojmë si qytetarë të thjeshtë, po të ishte amnisti, Gruevski do të ishte sot në Maqedoni. Gruevski nuk është në Maqedoni. Me ndryshimet e fundit në Kodin Penal, Nikolla Gruevski nuk do të kthehet në Maqedoni. Unë e pohoj këtë. Ai nuk është kthyer deri më tani, për shkak të këtyre ndryshimeve as që do të kthehet, kjo është e sigurt.”- deklaroi Stevo Pendarovski President i RMV-së.

Kryetari i VMRO-DPMNE-së Hristijan Mickoski dje tha se lidhur me situatën me Gruevskin, kryetari i Kuvendit Talat Xhaferi dhe kreu i BDI-së Ali Ahmeti kanë marrë zarfe me USB në të cilat, siç ka thënë ai, ka pasur dëshmi për lidhjen mes LSDM-së, BDI-së dhe Gruevskit. Mickoski sot nuk deshi të bënte të ditur se për çfarë bëhet fjalë.

“Do t’i pyesni edhe Talat Xhaferin edhe Ali Ahmetin për përmbajtjen e asaj USB në atë zarf dhe çfarë dokumenti është në atë zarf dhe unë do t’i ndjek me kujdes deklaratat e tyre dhe do të ndjek me kujdes nëse do ta tregojnë  të vërtetën. Le t’i lëmë që ta tregojnë të vërtetën, sepse kanë marrë dy nga tre dokumentet.”- tha Hristijan Mickoski kryetar i VMRO-DPMNE-së.

Nga BDI i mohuan akuzat e Mickoskit.

“Ahmeti dhe Xhaferi nuk kanë marrë asnjë zarf dhe asnjë USB. BDI nuk është pjesë e ndonjë skenari apo komploti dhe nuk ka agjendë të dyfishtë”

Reagime për ndryshimet në Kodin Penal ka pasur edhe nga opozita shqiptare. Nënkryetari i Alternativës, Admirim Aliti, duke e përcjellë qëndrimin e partive të shqiptarëve në opozitë para selisë së Zyrës së Bashkimit Europian në Shkup, tha se i mbështesin deklaratat e Bashkimit Europian për ndryshimet në këtë ligj për përdorimin e flamurit europian dhe rrezikun që sjellin ndryshimet për rritjen e pandëshkueshmërisë. Në të njëjtën kohë, Aliti iu referua edhe deklaratës së Ahmetit lidhur me këtë ligj.

Opozita shqiptare shton se pavarësisht reagimeve negative të BE-së për ndryshimet në Kodin Penal, qeveria po manipulon me arsyetimin se ato janë të nevojshme për reformat në gjyqësor.