Në prag të fushatës zgjedhore për president dhe për deputetë, partitë politike përpos kushteve për koalicion parazgjedhor, nuk i anashkalojnë as kushtet për koalicion postzgjedhor. Nënkryetari i BDI-së, Arbër Ademi, thotë se domosdo që i kanë linjat e tyre të kuqe për partner pas zgjedhjeve. Ato janë marrëveshjet me fqinjët që janë arritur deri tani, por edhe ndryshimet kushtetuese.
“BDI ka linjat e kuqe për partneritet të ardhshëm koalicionues, ato janë respektimi i Marrëveshjes së Ohrit, marrëveshja e Prespës me Greqinë, respektimi i marrëveshjes për fqinjësi të mirë me Bullgarinë, ndryshimet kushtetuese dhe sigurisht se është edhe vetingu, pastërtia e figurave politike atë që e kemi kërkuar ne me ligj të posaçëm në Kuvend mandatin e kaluar dhe gjatë këtij mandati”, u shpreh Arbër Ademi, nënkryetar i BDI-së.
Arben Taravari nga koalicioni VLEN, thotë se rruga europiane e vendit është parakusht për të filluar bisedimet për koalicion. Shton se të gjitha partitë shqiptare janë në një vijë rreth kësaj çështjeje. Taravari thotë se ky kusht nuk do të thotë se duhet të zbatohet menjëherë, por të ketë garancë ndërkombëtare dhe një afat të caktuar.
“Ne si VLEN e kemi parakusht, jo kusht por parakusht për t’u bërë pjesë e Qeverisë vetëm nëqoftëse Maqedonia vazhdon rrugën europiane. Pa këtë nuk jemi të interesuar. Dikush tjetër nëse është i interesuar le të vazhdojë. Në parim ne kemi një marrëveshje xhentëlmene mes të gjitha partive politike shqiptare prej atyre të cilat kanë deputet, më të mëdhaja dmth se ka edhe prej atyre që kanë deputetë dhe mund të veprojë ndryshe, se nuk bëhemi pjesë e një qeverie që nuk i bën ndryshimet kushtetuese, respektivisht se nuk e vazhdon rrugën europiane të Maqedonisë”, tha Arben Taravari, VLEN.
Më herët nga VLEN kanë ofruar një afat gjashtëmujor për ndryshimet kushtetuese. Për këtë, Stefan Andonovski nga VMRO-DPMNE thotë se janë të gatshëm të diskutojnë me opozitën shqiptare për ndryshimet kushtetuese dhe të gjejnë metodën si të realizohen ato. Për bisedime me BDI-në, thotë se fillimisht integristët duhet të pastrohen nga kriminelët e pastaj të ulen të diskutojnë për koalicione.
“Nëse opozita shqiptare, unë më tepër me ta do të doja të bisedoj sepse BDI disa gjëra tjera së pari t’i përfundojë e më pas të diskutojë për politikë. Mendoj për shkarkimin e kriminelëve në radhët e tyre. Fillimisht duhet të flasim me opozitën dhe të shohim cilat janë metodat si të arrijmë deri te bisedimet për gjashtë muaj nga dita e zgjedhjeve, kjo do të ishte dhjetor 2024. Nëse opozita shqiptare ka modalitete, strategji dhe zgjidhje të cilat janë të afërta me VMRO-DPMNE-në dhe mundemi së bashku t’i zbatojmë, pse të mos flasim për ato metoda”, sqaroi Stefan Andonovski, VMRO-DPMNE.
Për këto kushte të VMRO-së ndaj BDI-së, Ademi thotë se është e amoralshme të sulmohet partia e tyre sepse siç thekson, BDI është partia më e reformuar në vend.
“BDI është partia më e reformuar në vend dhe me kapacitete më të avancuara institucionale dhe administrative përderisa korrupsioni tek partitë e tjera është i konfirmuar nga gjyqësori në vend. Prandaj është e amoralshme të shpifet dhe të sulmohet kësisoj”, shtoi Ademi.
Përndryshe edhe Lidhja Social Demokrate e Maqedonisë është në një vijë me partitë shqiptare sa i përket kushteve për koalicion, si para ashtu edhe pas zgjedhjeve. Kushti është të vazhdohet rruga europiane e vendit.