Pacientët me fibrozë cistike protestojnë: “Kjo qasje na bën të ndjehemi të mallkuar që jetojmë në Maqedoni”

Nuk duam që institucionet të na shikojnë vetëm si numër që proteston kundër tyre, ose se ka diçka personale kundër tyre, por jemi në situatë ku vetëm duam t’i shpëtojmë më të afërmit tanë!

Pacientët me fibrozë cistike sot sërish protestuan para Qeverisë me thirrje që shteti t’ua sigurojë ilaçin e nevojshëm për jetë normale. Edhe pse dje Ministri i Shëndetësisë Bekim Sali tha se do të fillojnë procedurat për sigurimin e ilaçit  personat e prekur nga kjo sëmundje kërkojnë që këto premtime të shkruhen në letër.

“Edhe përskaj asaj që morëm premtime të caktuara nga ana e autoriteteve ne prapëseprapë vendosëm të vijmë sot këtu sepse kërkesa jonë ishte që këto premtime të bëhen në formë të shkruar sepse këtë gjë që po e kërkojmë, e kërkojmë intezivisht në 3 vitet e fundit dhe në bisedat me institucionet për fat të keq nuk arritëm rezultatin që shpresonim”, tha Fiki Gaspar.

Ilaçi që po kërkohet është ilaç që rrit dukshëm kualitetin e jetës së personave me fibrozë cistike tha aktori Elmir Sejfullai, duke  bërë thirrje që i njëjti të sigurohet për të gjithë personat e prekur.

“Normalisht që revolta psikologjike dhe emocionale arrin kulmin, dëshpërimi është shumë i madh madje jam i sigurt që një pjesë e jona shpesh në vete është ndjerë i mallkuar pse ka lindur në një shtet që ka këtë qasje për jetët tona. Dje doli një pikë e vogël drite në fund të tunelit por ne përsëri vendosëm që të jemi sot këtu tu japim mesazhin atyre që ne i kemi zgjedhur që të ulen në kolltukët e kësaj ndërtese prapa nesh se pavarësisht përpjekjes fillestare ne nuk do rreshtim së kërkuari ilaçin derisa edhe pacienti i fundit të pajiset me të”, pohoi Elmir Sejfullai.

Përndryshe në vendin tonë janë rreth 130 pacientë të diagnostikuar me fibrozë, për momentin vetëm tetë prej tyre që janë në gjendje më të rëndë shëndetësore do ta marrin terapinë. Megjithatë Ministri Sali tha se po përpiqen që deri në fund të vitit të blihen terapitë për 30 pacientë gjithsej.