Në bisedimet me Bullgarinë, emocionet të lihen anash, sepse debati në fazën e parë të dialogut ka qenë shumë emocional, tha ministri i jashtëm Bujar Osmani. Ai tha se pasi të finalizohet plani aksionar për zbatimin e marrëveshjes për fqinjësi të mirë mes Maqedonisë së Veriut dhe Bullgarisë, do të mund ta caktohet data e konferencës dypalëshe ndër-qeveritare.
“Po e definojmë atë, jam në komunikim të vazhdueshëm me ministren Zaharieva, po ashtu edhe shërbimet tona komunikojnë në pjesën e finalizimit të tekstit. Për shkak se finalizimi i tekstit është proces i komplikuar sepse përfshinë shumë institucione. 07.46-08.02 Unë mendoj se 99% e planit aksionar që i përmban sektorin e bashkëpunimit është finalizuar, presim ta përfundojmë pjesën e mbetur dhe të caktojmë një datë”, u shpreh Bujar Osmani – Ministër i Punëve të Jashtme.
Ministrja e Jashtme e Bullgarisë, Ekaterina Zaharieva në një intervistë tha se Bullgaria nuk e konteston identitetin maqedonas, por vetëm kërkon zbatim të marrëveshjes për fqinjësi të mirë.
“Nuk është e vërtetë se kontestojmë identitetin tuaj. Kjo është një gënjeshtër. Shumë herë e kemi treguar dhe politikanët e tuaj e dinë këtë. Por siç duket është më e lehtë të prezantohet para opinionit dhe para politikanëve evropian se Bullgaria e konteston identitetin. Mendoj se kjo çështje është e zgjidhur me aktin e pranimit të pavarësisë tuaj nga ana e Bullgarisë”, theksoi Ekaterina Zaharieva – Ministre e Punëve të Jashtme e Bullgarisë.
Më 17 nëntor, në takimin ministror të vendeve anëtare të BE-së, Bullgaria vendosi veto ndaj kornizës negociuese të Maqedonisë së Veriut për fillimin e negociatave të anëtarësimit në BE. Ministrja bullgare e punëve të jashtme, Ekaterina Zaharieva, në atë kohë deklaroi se “një shtet i bazuar në një ideologji armiqësie ndaj Bullgarisë nuk ka vend në BE”.