Osmani s’është i shqetësuar për “non paper-in”, Rama thotë se e ka parë dokumentin, por nuk e komenton

Ministri i Punëve të Jashtëm, Bujar Osmani, nuk është aspak i shqetësuar nga non paper-i për ndryshimin e kufijve në Ballkanin perëndimor. Ai thotë se me anëtarësimin e vendit në NATO, territori i vendit është i sigurt.

“Maqedonia e Veriut nuk është përmendur në këtë “non paper”, sepse ne jemi në NATO dhe askush nuk e sheh më Maqedoninë e Veriut si opsion për ndryshim të kufijve”, tha Osmani.

Osmani gjithashtu theksoi se në komunikim me autoritete sllovene është siguruar se një dokument i tillë nuk ekziston.

“Kryeministri Jansha publikisht demantoi se ka një “non paper” të tillë nga Sllovenia. Në komunikimin tim me ministrin e Punëve të Jashtme jam siguruar që nuk ka asnjë ndryshim në strategjinë dhe politikën e Sllovenisë”, njoftoi Osmani.

Ai thotë se duhet të jemi shumë të kujdesshëm në lidhshmërinë e Sllovenisë me këtë dokument sepse kjo mund të prishë raportet miqësore me Slloveninë.

“Në politikën e jashtme, spekulimet mund t’ju kushtojnë shtrenjtë marrëdhënieve ndërkombëtarë, prandaj duhet të jemi shumë të kujdesshëm kur nuk kemi vërtetim ose dëshmi se një iniciativë është e lidhur me ndonjë shtet“, deklaroi më tej Osmani.

Por përkundër Osmanit, kryeministri i Shqipërisë Edi Rama pohon se një dokument i tillë ekziston.

“E kam parë e kam biseduar me të, me kryeministrin slloven kohë më përpara. E kam biseduar në përgjithësi për ide dhe e kam parë edhe këtë dokument që ka dalë. Nuk kam asnjë koment”, tha Rama.

Ditë më parë portali slloven “Pa censurë” (Necenzurisano) publikoi një dokument jozyrtar diplomatik ku sugjeroheshin ndryshime të kufijve në Ballkan. Dokumenti parasheh Bashkimin e Kosovës dhe Shqipërisë, bashkimin e pjesës më të madhe të Republikës Sërpska me Serbinë, ndërsa më pas sugjerohet zgjidhja e çështjes kombëtare kroate, dhe atë në dy mënyra, duke bashkuar kantonet kryesisht kroate në Bosnjë-Hercegovinë me Kroacinë ose duke i dhënë pjesës kroate të vendit një status të veçantë sipas modelit të Tirolit të Jugut. Për boshnjakët parashihet një shtet që funksionon në mënyrë të pavarur dhe për të cilin ata duhet të marrin përgjegjësinë e plotë.