Osmani: Opozita e pa interesuar për veton! Aleanca për Shqiptarët e sheh si dezertor Bujar Osmanin

Opozita shqiptare nuk ka asnjë interes për bisedimet që bëhen në mes Maqedonisë dhe Bullgarisë. Kështu tha mbrëmë në emisionin Click Plus ministri i punëve të jashtme Bujar Osmani.

“Nuk shoh tek opozita shqiptare asnjë interes në këtë temë përveç se të gjejnë ndonjë fije për të sulmuar BDI-në për të më sulmuar mua, për ndonjë interes të vogël të tyre.
Për fat të keq ky është niveli i pjekurisë politike, do të t’iu duhet kohë.
Nuk kanë bërë as kërkesë dhe as nuk kanë shprehur interes” tha Bujar Osmani – Ministër i Punëve të Jashtme.

Por të kundërtën e tha para një jave lideri i Alternativës Afrim Gashi. Sipas tij pushteti ka përjashtuar opozitën nga bisedimet.

“Nëse qeveria nuk dëshiron debat me opozitën nuk e informon opozitën, nuk i intereson mendimi i opozitës, ajo kokë më vete e shtyn këtë proces, dhe nuk ka pse arsyetohet me opozitën, fajët i ka vetë ajo, se ajo është përjashtuese, ne jemi këtu për të ndihmuar”, theksoi Afrim Gashi – kryetar i Alternativës.

Ndërsa sot para dyerve të ministrisë së punëve të jashtme konferencë mbajti departamenti i politikës së jashtme të Aleancës për Shqiptarët.
Arben Fetai nga ky departament tha që Osmani mundohet të gjej një fajtor kujdestare për dështimet e kësaj qeveria.

“Besoj që kjo është fajësimi që e përmenda më herët, mundohen të gjejnë një fajtor kujdestarë, jashtë qeverisë. Fatkeqësisht Bujar Osmanin e shohë si dezertorë. Ai e ka pasur përsipër integrimin evropian me vite në momentin që këta kanë parë që integrimi ka ngecur për faj të tyre, i përmenda rastet e korruptimit “zhvatja”, veton bullgare tash për mos zbatimin e traktatit për miqësi”, potencoi Arben Fetai nga Aleanca për Shqiptarët.

Ndryshe lideri i kësaj partie Ziadin Sela para disa ditëve tha se fajtorët për dështimin e integrimit në BE kanë emër dhe mbiemër dhe kërkoi dorëheqjen e Osmanit, Dimitrovit dhe Zaevit.