Opozita shqiptare “Manifestin” e sheh si teatër,  e quajnë manipulim me opinionin për të mbuluar dështimet

Opozita shqiptare e sheh si teatër politik dhe përpjekje për manipulim të opinionit Manifestin e firmosur nga 12 partitë e shumicës parlamentare, si zotim për mbështetjen e bisedimet për integrim të plotë të vendit në BE. 

Nga Lëvizja Besa thonë se ky manifest është thjeshtë tentativë për manipulim të opinionit. Sipas tyre, ka shumë çështje tjera të cilat duhet të regullohen në Maqedoni, e më pas BE-ja vet do i hapë dyert për anëtarësim.

“I ashtuquajturi manifest nuk është gjë tjetër përveç se tentativë për të manipuluar opinionin, e në praktikë gjithçka veprojnë kundër anëtarësimit në BE dhe vlerave të BE. Derisa nga njëra anë nënshkruhen vetëm letra, a nga ana tjetër rritet korrupsioni dhe pasurimi i familjarëve të Kovaçevskit dhe Ahmetit, BE-ja do na mbajë largë dhe do të mbetet vetëm ëndërr”, thonë nga Lëvizja Besa.

Nga Alternativa për TV21 thanë se Manifesti nuk është i nevojshëm sepse për eurointegrime nevojiten vepra, e qëndrimet e partisë i kanë përsëritur mijëra herë.

“Nuk kemi dhe nuk kemi arsye të pohojmë diçka për të cilën jemi deklaruar mijëra herë. Eurointegrimi nuk është çështje deklarimi e manifesti, por përcaktimi dhe veprimi”, pohoi Zeqirija Ibrahimi, sekretar gjeneral Alternativa.

Izet Mexhiti që së shpejti do ta themelojë Lëvizja Demokratiken për TV21 thotë se gjithçka është teatër politik dhe përpjekje për t’i mbuluar dështimet.

“Teatër politik. Duan t’i mbulojnë dështimet dhe skandalet me piar të krizës. Herë japin dorëheqje, herë nënshkruajnë manifest mes vete”, pohoi  Izet Mexhiti, Lëvizja Demokratike.

Përndryshe partitë e shumicës parlamentare përmes këtij Manifesti duan që të krijohet një unitet për konceptin evropian dhe të gjitha partitë politike të mbështesin dhe kontribojnë për anëtarësim të plotë në Bashkimin Europian. “Me propozim manifestin, deklarojmë se do të angazhohemi për realizimin e të gjitha detyrimeve që dalin nga kriteret politike për anëtarësim në BE”, thuhet mes tjerash në Manifestin e 12 partive politike në pushtet.