Opozita ankohet për jotransparencë! Nuk ka qasje në bisedimet për zgjidhjen e kontestit me Bullgarinë

Opozita ankohet se nuk di asgjë se çka po bisedohet mes Bullgarisë dhe Maqedonisë së Veriut, për shkak se, siç thonë,  pushteti nuk ndanë asnjë informacion me ta. Nga VMRO-DPMNE thonë se i vetmi informacion që kanë është se gjatë fundjavës është punuar intensivisht në dy ministritë e Punëve të Jashtme edhe në Maqedoni edhe në Bullgari, por nuk e dinë se çka ka qenë lëndë e bisedimeve.

 “Atë që e kemi si informacion është se gjatë fundjavës është punuar intensivisht në dy ministritë e Punëve të Jashtme edhe në Maqedoni edhe në Bullgari. Ekipe të angazhuar nga ministritë kompetente kanë pasur komunikime të ndërsjella por për fat të keq nuk kemi informacione se për çka janë marrë vesh ose jo, çfarë ka qenë lëndë e bisedimeve, sepse Qeveria punon në mënyrë jo transparente”, tha Antonio Milloshoski – deputet i VMRO-DPMNE-së.

Edhe opozitarja Alternativa ankohet se nuk dinë se çfarë ka në tavolinën e bisedimeve me Bullgarinë. Lideri i kësaj partie Afrim Gashi, mbrëmë në Click Plus tha se pushteti ka përjashtuar opozitën nga kjo çështje me interes të përgjithshëm.

 “A  e dini se çfarë kanë shkëmbyer brenda këtyre 2, 3 ditëve Qeveritë tona edhe ajo e Bullgarisë. Jo! Si mund ne, nga ky emision të japim zgjidhje për diçka që nuk e dimë. Është tejet joserioze dhe e pa përgjegjshme nga ana e Qeverisë që përjashton opozitën. Unë mendoj që jo vetëm opozita, Qeveria në një përballje të këtillë që është identitare dhe integruese për vendin, jo vetëm që duhet të krijojë konsensus politik  ajo duhet të krijoj edhe konsensus shoqëror”, u shpreh Afrim Gashi – Kryetar i Alternativës.

E në Komisionin për politike të jashtme përfaqësuesit e LSDM dhe BDI  votuan kundër që në Kuvend të diskutohet për çështjen me Bullgarinë dhe eurointegrimet e vendit.

 “Ne kemi thënë dhe do ta përsëris edhe tani për gjuhen maqedonase dhe identitetin maqedonas të cilat janë fakt nuk shohim nevojë që të diskutohet në Kuvend. Ajo është  fakt dhe për atë në Kuvendin e Maqedonisë nuk ka nevojë të diskutohet. Nëse kanë dëshirë të diskutojnë për identitetin dhe gjuhën maqedonase, për maqedonasit dhe maqedonaset atëherë le ta bëjnë në nje vend tjetër dhe jo në Kuvend”, potencoi Jovan Mitreski – deputet i LSDM-së.

Ndërkohë opozita edhe ajo shqiptare edhe maqedonase kanë kërkuar takim liderësh që të diskutohet kontesti me Bullgarinë dhe mundësia për gjetjen e një zgjidhje të përbashkët, por një gjë të tillë kryeministri Zoran Zaev nuk e ka parë të nevojshme.