Nxënësit e Leshnicës bojkotojnë mësimin, prindërit ankohen për objektin e vjetër të shkollës

40 nxënës nga Leshnica e Zhelinës kanë bojkotuar mësimin edhe pse nga ministria i kanë lejuar që mësimi të zhvillohet me prani fizike.  Prindërit e fëmijëve  janë të revoltuar me objektin e shkollës e cila është ndërtuar në vitin 1976. Sipas tyre çatia e kësaj shkolle është material kancerogjen . Ata kërkojnë ndërtimin e një shkolle të re.

 -Ne kemi kërkuar që të mbahet mësimin, por jo në këtë shkollë. Ne jemi që fëmijët të mos i lëshojmë në shkollë,  jemi për bojkot pasi kjo nuk i plotëson kushtet për të mësuar fizikisht Nuk i plotësojnë as kushtet pasi që të gjithë me ndihma sociale jetojnë,  duhet të kenë lap topa. Interneti i dobët është shumë,- prind.

-Ne fëmijët nuk i lëshojmë hajde dhe shiheni  brenda si është katastrofë  dhe nuk i lëshojmë dhe nuk i lejomë që të hynë aty dhe të sëmuren,-prind.

-Këtë shkollën tonë 10 vite jemi duke e kërkuar,  por një donacion që ka ardhur nga Zvicra dhe kryetari i komunës  pasi që ka marr pak vota në këtë fshat donacionin e ka dërguar në Çiflik  dhe me paratë  shkollës së Leshnicës e kanë  ndërtuar shkollën në Çiflik,-prind.

Zeqir Memeti, drejtori i shkollës qendrore “Luigj Gurakuqi” pranon se Inspektorati i arsimit për këtë shkollë para 15 viteve kishte konstatuar se nuk plotëson kushtet.

-Këtë shkollë që e shihini është unikate dhe e vetmja që ka ngel nga sistemi monist  dhe këtu para shumë viteve inspektorati  ka bërë procesverbal  që nga asbesti që e ka si material kancerogjen shkolla të mbyllet  dhe prindërit atëherë nuk kanë qenë të zëshëm. Ne si shkollë si drejtori bashkë me sekretarin  jemi munduar t’i ofrojmë shkollës atë që mundemi, ne kemi bërë lyerjen e hapësirave brenda në shkollë që nuk janë lyer me vite dhe meqë ra pandemia të ndërmarrim diçka,- Zeqir Memeti, drejtor i Shkollës “Luigj Gurakuqi”.

Banorët thonë fshati i tyre nuk i plotëson as kushtet për mësimin online, pasi që në disa vende në fshat nuk ka as rrjet  dhe fëmijët nuk janë të pajisur me laptopë apo kompjuterë për mësimin online.

Në këtë shkollë mësimin e ndjekin nga klasa e parë deri në të pestën, ndërsa më pas mësimin e vazhdojnë në shkollën qendrore që gjendet në Zhelinë.