Nicole Oliveira nga Brazili ka qenë e interesuar për hapësirën që kur ishte shumë e vogël. Sot, në moshën 8-vjeçare, është bërë astronomja më e re në botë falë bashkëpunimit të saj me NASA-n. Programi në të cilin Nicole merr pjesë, njihet si “Gjuetarët e Asteroidëve” dhe është krijuar për të prezantuar të rinjtë në shkencën e Astronomisë duke i ndihmuar ata të bëjnë zbulimet e tyre.
Nicole i tha AFP se tashmë ka gjetur 18 asteroidë dhe planifikon t’i emërojë ata sipas shkencëtarëve brazilianë, si dhe anëtarëve të familjes së saj. Mund të duhen disa vjet për të konfirmuar se zbulimet e saj janë me të vërtetë asteroidë, por nëse kjo ndodh, atëherë Nicole do të jetë personi më i ri në botë që do të zbulojë zyrtarisht një asteroid.
Që nga 23 tetori 2004, janë zbuluar më shumë se 700 asteroidë 1 km në diametër ose më të mëdhenj. Asteroid Hunters drejtohet nga International Astronomical Search Cooperation, një program shkencor i lidhur me NASA-n për qytetarët e zakonshëm. Ky shërbim siguron të dhëna astronomike me cilësi të lartë për shkencëtarët qytetarë në të gjithë botën.
Këta qytetarë janë në gjendje të bëjnë zbulime origjinale astronomike. Shkencëtarët qytetarë regjistrohen si pjesë e një ekipi, shumica vijnë nga shkollat e mesme, kolegjet dhe universitetet. Nëse ata gjejnë një shkëmb hapësinor, atëherë pas konfirmimit, i cili zgjat deri në pesë vjet, ata zyrtarisht mund t’i japin një emër zbulimit të tyre.
