Një i vrarë dhe një i lënduar! 80 plumba janë shkrepur mbrëmë në Butel 2

Një person është vrarë, ndërsa një tjetër me disa plagë nga plumbat urgjentisht është dërguar në SPQ “Shën Naumi i Ohrit” pas të shtënave të mbrëmshme në Butel 2.

“Në parkingun në rajonin e Çairit ku ka qenë i parkuar një automobil “Volkswagen Golf7” me targa të Shkupit në të cilin ka qenë vozitës 24 vjeçari L.P. nga Shkupi dhe bashkudhëtari i tij 43 vjeçari K.I. nga Shkupi, pasi që disa persona me armë zjarri kanë shtënë në drejtim të automobilit”, tha Suzana Pranjiq – zëdhënëse e MPB-së.

Sipas burimeve të MPB, janë shtënë mbi 80 plumba, të cilët kanë qenë të kobshme për 43 vjeçarin K.I dhe i njëjti ka ndërruar jetë në vendin e ngjarjes, ndërsa vozitësi, 24 vjeçari L.P me automjetin e ndihmës së shpejtë urgjentisht është dërguar dhe hospitalizuar me lëndime të rënda trupore.

“Ekspertizë në vendin e ngjarjes ka kryer ekipi për ekspertizë pranë SPB Shkup dhe prokurori publik me urdhrin e të cilit trupi i të ndjerit është dorëzuar në obduksion, ndërsa automjeti është blombuar dhe është dërguar në stacionin policor të Kisella Vodës për procedurë të mëtejshme”, deklaroi zëdhënësja e MPB-së, Suzana Pranjiq.

Personi i cili ka humbur jetën edhe më herët ka qenë i njohur për policinë pas gjuajtjes me armë te hoteli Aleksandar Palace në vitin 2019.

Hetimi i cili po vijon duhet të konfirmojë motivet për këtë incident që mbrëmë para festës së madhe të Bajramit shqetësoi banorët e Çairit.