Nikolloski: Ka njerëz për dialog në Sofje/ Keremedçiev: Dialogu duhet të udhëhiqet në Bruksel

Si përzierje në punët e brendshme të vendit, zv/kryeministri Aleksandar Nikolloski e vlerësoi kërkesën e politikanëve bullgarë për shkarkimin e tij. Ai në një intervistë televizive thotë se të gjitha deklaratat që i ka dhënë në periudhën e kaluar për autoritetet në Sofje janë në koordinim me kryeministrin Mickoski. Nikolloski mendon se edhe pse retorika me Bullgari u ashpërsua, do të ketë me kë të udhëhiqet dialog në Bullgari për zhbllokimin e procesit eurointegrues sepse “atje do të frynin erëra të reja”.

“Në Bullgari absolutisht do të ketë me kë të bisedohet, këta nuk janë ata 20 njerëz që janë për momentin, prej të cilëve 10 janë politikanë që fundosen dhe 10 të tjerë që nuk mund të gjejnë veten e tyre”, tha Aleksandar Nikolloski.

Analisti dhe ish zëvendës ministër për punët e jashtme të Bullgarisë, Milen Keremedçiev thotë se dialogu duhet të udhëhiqet në Bruksel.

“Ajo që politikanët në Maqedoninë e Veriut fokusohen që të ketë retorikë antibullgare, në asnjë mënyrë nuk do ta ndryshojë fillimin e procesit negociues, për shkak se Bullgaria nuk do të tërhiqet nga kërkesat që për momentin nuk janë nga Bullgaria por nga Europa”, deklaroi Milen Keremedçiev.

Sipas tij, pushteti aktual në Maqedoninë e Veriut nuk dëshiron që vendi të bëhet anëtar i BE-së në të ardhmen e afërme. Bën gjithçka që t’i shfrytëzojë marrëdhëniet me Bullgarinë si arsyetim për rrugën e tyre që çon drejt integrimit me Serbinë, Kinën, Rusinë, Hungarinë…

Keremedçiev megjithatë shton se edhe politikanët bullgarë duhet të kenë kujdes për gjuhën që përdorin sidomos në periudhën parazgjedhore. Bullgarët në fund të këtij muaji do të votojnë në zgjedhjet e shtata parlamentare brenda 3 viteve ndërsa Shkupi pret që të formohet qeveri e qëndrueshme politike për dialog.