Ngecje edhe në lirinë e shprehjes! KE kërkon reforma në RTVM dhe luftën kundër dezinformatave

TË FUNDIT

Në fushën e lirisë së shprehjes, Komisioni Evropian vlerëson se Maqedonisë e Veriut, ka një farë niveli të përgatitjes dhe se deri më tani ka bërë progres të kufizuar.

 “Ka përparim të vogël sepse reformat në këtë fushë nuk kanë lëvizur nga pika zero”, tha Sefer Tahiri – profesor.

Mbeten të vlefshme disa nga rekomandimet e vitit të kaluar. Ndër to kërkohet që:

Rekomandim i KE-së për lirinë e shprehjes dhe të mediave

  • të bëhet me prioritet  reforma e transmetuesit publik, duke siguruar qëndrueshmërinë financiare dhe pavarësinë dhe të përfundojë emërimet për Këshillin e Programit të transmetuesit publik dhe Këshillin e Rregullatorit të Medias;

Këto dy trupa janë kyç në reformat në media, thotë profesori Sefer Tahiri, por mungesa e vullnetit politik ka bërë që të mos ketë asnjë lëvizje për zgjedhjen e anëtarëve të tyre që bëhet me 2/3 e Kuvendit.

 “Pa u bërë reformimi i plotë dhe pa u bërë pavarësimi i organit rregullator që është një ndër institucionet më relevante të sistemit mediatik, dhe pa u transformuar tërësisht shërbimi radiodifuziv, i cili 30 vite pas demokratizimit dhe pluralizmit vazhdon të funksionojë si shërbim shtetëror, me mendësinë e vjetër të ish sistemit, ne nuk mund të themi që Komisioni Evropian dhe organizmat ndërkombëtarë do të vlerësojë se ka përparim në aspektin e demokratizimit të sistemit mediatik”, u shpreh Sefer Tahiri – profesor.

Rekomandim tjetër i KE-së për Maqedoninë e Veriut është që:

Rekomandim i KE-së për lirinë e shprehjes dhe të mediave

  • të rriten përpjekjet për të luftuar dezinformimin dhe për të krijuar qëndrueshmëri të mediave;

Kryetari i Shoqatës së Gazetarëve të Maqedonisë, Mladen Çadikovski, thotë se lufta kundër lajmeve të rrejshme është luftë që duhet të vazhdojë, gjë që përpiqet ta bëjë “Promedia.mk”.

“Problemi ngelet sepse nëse i shohim se cilat janë mediat apo organizatat kryesore që i krijojnë narrativet dizinformuese, kjo mbetet më e theksuar në hapësirën online dhe këtu mendoj se duhet të orientohen përpjekjet që duhet t’i bëjmë si shoqëri””, deklaroi Mladen Çadikovski – Kryetar i SHGM-së.

Ka portale që janë krijuar për të përhapur dezinformacione. Çadikovski madje shton se më se shpeshti lajmet e rrejshme vijnë nga qendra politike.

“Po qendrat politike këtë e bëjnë që të dëmtojnë kundërshtarët politik. Kështu ata keqpërdorin disa portale që praktikisht janë krijuar për këto qëllime”, potencoi Mladen Çadikovski – Kryetar i SHGM-së.

Vetërregullimi i mediave është forma përmes së cilës duhet udhëhequr kjo betejë. Kjo sepse përpjekjet për të luftuar dezinformatat nga jashtë mund të sjellë ndikime dhe censurë në media.

Rekomandim i tretë i Komisionit për fushën e mediave është që Maqedonia “organet e zbatimit të ligjit dhe autoritetet gjyqësore të sigurojë ndjekjen e shpejtë dhe efektive të të gjitha rasteve të dhunës fizike dhe verbale ndaj gazetarëve”.

error: Content is protected !!