Këtë pasdite në Bllagoevgrad u hap klubi kulturor maqedonas “ Nikolla Vapcarov”. Me këtë rast mori pjesë edhe lideri i VMRO-DPMNE-së, Hristijan Mickoski . Ai u takua me nipin e Vapcarovit i cili tha se askush nuk e ka ftuar në këtë manifestim.
-Unë jam nipi i Nikolla Vapcarovit.
-Mirë.
-Ai është vëllai i babait tim.
-Shkëlqyeshme.
-Këtu dua t’jua dhuroj këtë libër që e shkruam për Nikolla Vapcarov, brenda tij është gjithçka. Sidomos faqja e fundit është e shkruar me shkrimin e Nikolla Vapcarov, këtu shkruan se kush ka qenë ai dhe çfarë ka qenë.
-T’ju jap unë një libër nga historia jonë maqedonase që e ka shkruar Nikolla Jonkov Vapcarov për Maqedoninë dhe identitetin e tij maqedonas. Herën e ardhshme ju premtoj se do t’ju jap libër. Ju lexojeni dhe mësojeni historinë tuaj, ndërsa ne do ta lexojmë dhe mësojmë historinë tonë. Po ashtu edhe unë do t’ju jap një shkrim nga Nikolla Jonkov Vapcarov, do t’ju jap edhe një fotografi se si shkruan së bashku me Kosta Solev Racin dhe Venko Markoski dhe me të tjerët.
Kryetari i klubit tha se klubi do të jetë vend për të gjithë maqedonasit nga Maqedonia e Pirinit.
“Bullgarët në Maqedoni nën presionin e Bullgarisë shkojnë drejt njohjes, ndërsa këtu shteti ynë ende është me qëndrim se ne nuk jemi legjitimë, se nuk ka maqedonas, ne e kontestojmë këtë me vetëpërcaktim personal.”- deklaroi Atnas Maznev, Kryetar i klubit në Bllagoevgrad.
VMRO-ja bullgare organizoi protesta para hapjes së klubit. Ndërsa eurodeputeti Angell Xhambaski vendosi fotografi të Goce Dellçevit, Dame Gruevit, për të cilët tha se janë bullgarë.
“Njerëzit që flasin këtu, që veprojnë dhe duan ta bëjnë këtu në garazhin prapa nesh, janë separatistë. Ata duan ta ndajnë Maqedoninë e Pirinit nga Bullgaria, gjë që i dëmton relacionet, po ashtu edhe vizita e Mickoskit. Ne çdo herë do të tregojmë se Maqedonia është bullgare. Maqedonia e Veriut është një shtet tjetër.”- deklaroi Angell Xhambaski, eurodeputet bullgar.
Duke iu përgjigjur pyetjes së gazetarëve se pse nuk morën pjesë në hapjen e klubit maqedonas në Bllagoevgrad, kryeministri Dimitar Kovaçevski tha se nuk ka shkuar në Bullgarinë për shkak se sot do të ketë seancë të Qeverisë, për ballafaqimin me krizën energjetike.
“Më vjen mirë që qytetarë maqedonas, duke e përfshirë edhe Mickoskin dhe Apasievin, mund lirisht të shkojnë dhe të gëzohen për hapjen e klubit kulturor maqedonas në Bullgari. Mendoj se ky është një prej përfitimeve të marrëveshjes me Bullgarinë dhe prej fillimit të negociatave me BE-në.”
Delegacionet nga Maqedonia që shkuan në Bullgari, u ankuan se ishin kontrolluar në vendkalimin kufitar, gjithashtu ua kanë marrë për kontroll edhe pasaportat gjatë hyrjes së Bllagoevgrad.