Nevoja për ribalanc të buxhetit është akute, Xhevdet Hajredini: Qeveria të punojë e jo të lëvdohet

TË FUNDIT

Ribalanc të Buxhetit do të ketë, theksojnë nga Qeveria, por se kur do të ndodhë kjo gjë varet nga më shumë faktorë. Sipas paralajmërimeve të njerëzve të parë të ekipit ekonomik, rebalanci do të vijojë pasi që të bëhen kalkulimet për shpenzimet e gjithë institucioneve. Këtë mbrëmë në EU Klik edhe një herë e konfirmoi zv.kryeministri për çështje ekonomike, Fatmir Bytyqi.

Sipas ekonomistëve, rebalanci ka qenë i pritur. Ish-ministri i financave, Xhevdet Hajredini, thotë se është nevojë akute që Qeveria në kohë të shqyrtojë se ku së pari duhet të veprojë.

-Ne shohim që rritja e bruto prodhimit shoqëror po bie në mënyrë drastike, që do të thotë se kjo reflektohet në të ardhurat e buxhetit. Këtë vit, është shumë më akute nevoja që Qeveria të shqyrtojë çfarë duhet të ndryshojë brenda strukturës së përgjithshme të shpenzimeve dhe të ardhurave.  Qeveria do të duhet të dal me propozim, me rang listë të prioriteteve në muajt e ardhshëm në vend,-pohoi Xhevdet Hajredini, ish ministër i Financave.

Hajredini në mënyrë pozitive i vlerëson përpjekjet e Qeverisë për të ndihmuar qytetarëve në kushte pandemie. Megjithatë paralajmëron se nuk është koha për lëvdata por për punë.

-Kryeministrit dhe ministrave më së paku u nevojitet që të flasin dhe të lëvdohen për ekonominë, ata paguhen që të punojnë e jo të lëvdohen. Për fat të keq vazhdojnë, jo si më parë, që edhe ekonominë edhe financat t’i shfrytëzojnë si marketing për suksese të mëdha,-deklaroi Xhevdet Hajredini, ish ministër i Financave.

Ish ministri i financave paralajmëroi se situata në sektorin ekonomik është dramatike edhe atë te të gjithë kategoritë, andaj detyrë e Qeverisë dhe ministrive është që të përmirësojnë gjendjen e përgjithshme ekonomike. Tani nuk është koha për të atribuuar suksesin personal, këshillon Hajredini.