Nesër votohet Qeveria e re/ Opozita e quan koalicion pazari

Kuvendi nesër mban seancën për rikonstruimin e Qeverisë. Do të zgjidhen ministrat e rinj të Aleancës për Shqiptarët e do të shkarkohen të vjetrit nga Alternativa.

Kuadro të ASH-së që janë propozuar janë Krenar Lloga për ministrinë e Drejtësisë të udhëheqë, Fatmir Mexhiti për Shëndetësinë, Azir Aliu për ministrinë për Shoqëri Informatike dhe Administratë, ndërsa me ministrinë për Mjedis Jetësor dhe Planifikim Hapësinor Kaja Shukova nga LSDM. ASH merr edhe dy poste zëvendësministrash. Tiron Jajaga, zëvendësministër në Mbrojtje dhe Vjollca Berisha zëvendësministre e Bujqësisë.

Rregullorja parlamentare për shkarkimin e ministrave parasheh seancë në të cilën nuk kufizohet koha e diskutimit.

Për opozitaren maqedonase VMRO-DPMNE koalicioni i ri mes ASh-së dhe Qeverisë është koalicion “Pazar3”. Nga kjo parti insistojnë në zgjedhje të parakohshme parlamentare si zgjidhje e vetme e kaosit politik.

“Është e qartë se me këtë zgjedhje të qeverisë së re me një afat më pak se 10 muaj, Maqedonia në kushte të krizës energjetike, ekonomike, financiar dhe me krizë të borxheve nuk do të marrë asnjë cilësi, por vetëm mbushen radhët në Kuvend për të mbajtur shumica e brishtë. Shkak për këtë janë tenderët, marrëveshjet në katër sy dhe tentativa për t’i shpëtuar drejtësisë”- deklaroi Naum Stoillkovski, zëdhënës i VMRO-DPMNE.

Nga ana tjetër LSDM edhe sot nëpërmjet një kumtese thonë se kanë siguruar shumicë që do të çojë përpara shumë procese të rëndësishme për vendin.

“Shumica e zgjeruar mundëson vazhdimin e tranzicionit energjetik, nismat ekonomike si Ballkani i Hapur, bashkëpunim rajonal, mbështetje më të madhe për partneritetin strategjik me SHBA-në dhe avancimin e marrëdhënieve të mira fqinjësore.”- thanë nga LSDM.

Përbërjen e re qeveritare do ta përkrahë deputeti i pavarur Skender Rexhepi. TV21 pyeti Rexhepin se a do të kërkoj ndonjë resor shtesë në Qeveri në këmbim të mbështetjes së tij, pasi Qeveria nuk ka propozuar shkarkimin e zv/ministri të Kulturës Daim Luçi që llogaritet si njeri i afërt me Rexhepin.

“Unë kisha dhe kam vërejtjet e mia ndaj qeverisë para dhe asaj që duhet të vjen, por vërejtjet e mia do t’i them në kohën në vijim, ndërsa në bazë të rrethanave do të diskutoj edhe pozitën time dhe përgjegjësinë qeverisëse në kuadër të shumicës.”- tha Skender Rexhepi, deputet i pavarur.

Pritet që nesër grupi i zjarrit të mos votojë për Qeverinë e re. Një gjë të tillë pritet ta bëjë edhe deputeti i shumicës Pavle Trajanov.