Nesër ngrin çmimi i vezëve dhe orizit! Bekteshi: Për Pashkë dhe Ramazan nuk do të lejojmë rritje të çmimeve

Nga nesër do ngrin edhe çmimi i vezëve, bëri të ditur ministri i Ekonomisë Kreshnik Bekteshi. Se sa do të jetë çmimi i ngrirë do të dihet nesër, ndërsa me vendim të Qeverisë do të kufizohet në përqindje edhe eksporti i tyre jashtë vendit, kjo për arsye se momentalisht është rritur kërkesa për eksport të vezëve nga Maqedonia drejt shteteve tjera, për shkak të çmimit më të lartë që shiten në shtete të caktuara. Me këtë vendim Bekteshi shpjegoi se nuk do të lejohet as rritje e çmimit e as mungesë të vezëve.

 “Momentalisht po rritet eksporti nga Republika e Maqedonisë drejt vendeve tjera, po rritet kërkesa nga shtetet tjera drejt prodhuesve tanë vendorë me çmime më të larta nga ajo që ne i kemi në treg. Nëse ne sjellim vendim për ndalesë të eksportit, do të jetë në kundërshtim me marrëveshjet CEFTA në rajon dhe në marrëveshjet për treg të lirë me Bashkimin Europian dhe mund të kemi sanksione të caktuara ndaj vendit tonë”, tha Kreshnik Bekteshi, ministër i Ekonomisë.

Përveç vezëve do të ngrihet edhe çmimi i orizit. Sa i përket çmimit të miellit dhe sheqerit, Bekteshi njoftoi se sipas të dhënave që kanë, çmimet e këtyre produkteve do të ulen pa pasur nevojë që të ndërmerren masa. Në rast se kjo nuk bëhet nga tregtarët, atëherë do të vijojnë masa shtesë edhe për çmimin e miellit dhe sheqerit .

 “Për sheqerin dhe miellin tashmë në përputhje me të gjitha të dhënat nga Drejtoria e Doganave në pjesën e çmimeve të eksportit dhe çmimin e prodhimit tashme kemi ulje dhe trendi i uljes do të vazhdoj prandaj në këtë pjesë nuk do të ndërmarrim asnjë lloj mase sepse presim që çmimet në ditët e ardhshme vetë të bien në përputhje me të dhënat që i kemi”, deklaroi Kreshnik Bekteshi, ministër i Ekonomisë.

Deri tani Qeveria ka ngrirë çmimin e bukës së bardhë dhe gjysmë të bardhë, pastave ose produkteve nga brumi dhe produkteve të qumështit.  Në javët në vijim do të analizohen edhe çmimet e mishit dhe produkteve nga mishi.