Nesër i ndahet Medalja Presidenciale, Joe Biden: Kombi i Kosovës është zemra e gjithë familjes Biden

Nesër, me në një ceremoni të cilën do ta organizojë Presidenca e Kosovës në krye me Vjosa Osmanin, do të ndahet Medalja Presidenciale për Sundim të Ligjit për të ndjerin Beau Biden, të birin e Presidentit amerikan, Joe Biden, për kontributin e tij në këtë fushë gjatë shërbimit të tij në Kosovë.

“Është nder të kem mundësinë që ta ndaj këtë medalje për të ndjerin Beau Biden, e cila u dedikohet edhe shumë grave e burrave të tjerë, të cilët erdhën nga Shtetet e Bashkuara të Amerikës për të shërbyer në Kosovë. Nëpërmjet letrës që ia kam dërguar kohë më parë, i kam propozuar Presidentit Biden që të na drejtohet nëpërmjet një video-mesazhi në këtë ceremoni”, shkroi mes tjerash, Osmani.

Këtë njoftim, ajo e ka shoqëruar me një video-paraqitje të presidentit amerikan, Joe Biden e cila mes të tjerash dëshmon raportet e mira mes Kosovës dhe Shteteve të Bashkuara të Amerikës.

“Duke pranuar këtë çmim në emër të djalit tonë, unë gjithashtu dua të kujtoj përparimin e jashtëzakonshëm që Kosova ka bërë gjatë 20 vjetëve të fundit, kanë qenë atje njerëz që kanë punuar pa u lodhur për të ndërtuar një të ardhme më të ndritur, dhe Beau e besoi atë për popullin e Kosovës. Ka akoma më shumë punë për të bërë, nuk kam nevojë të ua them, duhet më shumë punë për të luftuar korrupsionin për të mbrojtur të drejtat e pakicave etnike dhe fetare, për të ndërtuar marrëdhënie pozitive me kombet fqinje dhe për të forcuar zhvillimin ekonomik. Dhe ju premtoj, që SHBA do të mbeten partneri i palëkundur i Kosovës në këtë luftë. Kështu së bashku ne mund të dëshmojmë se shtetet demokratike janë në gjendje të plotësojnë nevojat e qytetarëve të tyre. Isha vërtet i lumtur që munda të ndaj një vaksinë të sigurt dhe efektive, vaksinën Pfizer, me të gjithë ju, nga furnizimi që kishim, që qytetarët e Kosovës të mposhtnin pandeminë Covid-19, dhe pres që vaksina tjera të dërgohen nga nisma ndërkombëtare Covax, dhe dozat do të vijnë brenda javëve. Si president i Shteteve të Bashkuara pres me padurim të vazhdoj thellimin e miqësisë tonë të jashtëzakonshme dhe partneritetin midis dy Kombeve tona. Përsëri, në emër të Natalie, mbesës sime të bukur, djalit tim të bukur dhe vëllait të tij Hunter dhe motrës së tij Ashley, dhe Jillit dhe nga e gjithë familja Biden, faleminderit për këtë nder të madh. Kjo ka më shumë rëndësi për ne sesa ju e mund ta paramendoni. Kombi i Kosovës është zemra e të gjithë familjes Biden. Dhe siç do të thoshte nëna ime, Zoti ju do”, ka thënë mes tjerash, Biden.

Ndërkohë, fjalimi i plotë do të publikohet nesër./TV21