Nesër fillon viti shkollor, vit i ri me probleme të vjetra/Klasat e gjashta pa libra, risi pushimi i prillit

Viti i ri shkollor fillon nesër dhe do të zgjasë deri më 17 qershor. Këtë vit për herë të parë nxënësit e shkollave fillore dhe të mesme do të kenë pushim pranveror dhe do të zgjasë nga 29 prilli deri më 5 maj. Praktikë kjo që aplikohet në disa vende europiane dhe që sipas shërbimeve profesionale do të sjellë rezultatet më të mira në mësim.

Ndryshe ngjashëm si vitin e kaluar edhe ky vit shkollor fillon me mungesë të librave, sidomos për klasat e gjashta.

“Programet e klasës së gjashtë arritën në fund të muajit të dytë, muaji tretë 2023 me çka kishim afat prej 6 muajsh. Nga muaji i tretë deri në muajin e 9, t’i kryejmë të gjitha procedurat por, ju siguroj atë që e kam thënë disa herë e them edhe tek ju, jemi në fazën përfundimtare në vendimet për miratimin e librave”, tha Jeton Shaqiri-ministër i Arsimit.

Problemet thuajse po përsëriten dhe po barten nga viti në vit. Ministri kishte deklaruar se nëse edhe këtë vit ndodh e njëjta situatë me librat dhe dëftesat shkollore, dikush duhet të mbaj përgjegjësi.

 “Reagimi i dytë në Byronë për zhvillim të arsimit ishte që dorëzimi i programeve të jetë në kohë, duke u bazuar në problemet që hasëm vitin e kaluar dhe Byroja për zhvillim të arsimit i dorëzoi në kohë për klasën e tretë  në fund të 2022 me presion dhe të tjerat u dorëzuan në fillim të shkurtit dhe sërish vazhdoi reagimi im deri tek byroja për zhvillim të arsimit, por nuk do të thotë se gjithë përgjegjësia është tek byroja për zhvillim të arsimit!”, deklaroi Jeton Shaqiri-ministër i Arsimit.

Ministri thotë se të gjithë librat e klasave tjera përveç klasës së gjashtë janë dorëzuar nëpër shkolla dhe pritet që nesër tu ndahen nxënësve. Klasat e gjashta do të furnizohen me libra deri në fund të shtatorit premton ministri.