Presidentja e Kosovës, Vjosa Osmani e shpalli të hënën, 26 korrik, ditë zie për vendin, në shenjë respekti për qytetarët e Republikës së Kosovës të cilët e humbën jetën në fatkeqësinë e rëndë të komunikacionit që ndodhi sot në mëngjes në Kroaci, lajmëroi korrespondenti i MIA-s nga Prishtina.
Në kumtesën nga kabineti presidencial, gjithashtu ceket se pas fatkeqësisë, në të cilën jetën e humbën dhjetë mërgimtarë kosovarë në Gjermani, Osmani do ta ndërprejë vizitën në Japoni, ku po qëndron me rastin e Lojërave olimpike, dhe nesër do të kthehet në vend.
Autobusi me targa të Kosovës, i cili qarkullonte në relacionin Frankfurt – Prishtinë, sot në mëngjes, rreth orës gjashtë, doli nga rruga dhe u rrokullis në afërsi të Sllavonski Brodit, me ç’rast, sipas bilancit të deritanishëm, jetën e humbën nëntë udhëtarë dhe njëri nga vozitësit e autobusit. Në spitalin në Sllavonski Brod janë pranuar për mjekim 44 të lënduar, prej të cilëve 15 në gjendje kritike.