Qyteti i Tetovës këtë vit nuk do të stoliset. Këshilli komunal ka vendosur që mjetet të cilat janë të destinaura për të stolisur qytetin për fundvit do të ridestinohen në përballjen me krizën që është shkaktuar nga pandemia Covid-19. Ndihmat do të shkojnë tek familjet në nevojë dhe tek ato familje që kanë përjetuar fatkeqësi të ndryshme.
Shembull i tillë është edhe Arben Ramadani, të cilit në gusht të vitit 2019 i është djegur shtëpia. Muaj më pas, Këshilli komunal i kishte ndarë 250 mijë denarë, por deri më tani atij i janë lëshuar vetëm një 30 mijë denarë edhe atë pasi rasti u publikua në TV21.
“Rasti që m’i kanë lëshuar të hollat ka qenë pasi që rasti është paraqitur në Televizionin 21, aty e kanë parë dhe kanë vendos që t’i mi lëshojnë 30 mijë denarë dhe nga ajo s’kam më asgjë. Në komunë më thonë se jemi ngushtë për shkak të pandemisë nuk kanë fonde për t’i lëshuar të hollat. Unë ju them se ka një vit e gjysmë dhe ju nuk keni kryer asnjë punë, më thonë do i lëshojmë me këste për pesë apo gjashtë muaj, por u bënë gati një muaj e nga ai 30 mijë denarë nuk ka asgjë”, u shpreh Arben Ramadani – qytetar i dëmtuar.
Nga Komuna e Tetovës thonë se mjetet që ndahen për familjet në nevojë, miratohen nga këshilli ndërsa pagesa e tyre realizohet në bazë të mundësive reale që ka buxheti i komunës.
“Në rebalancin e fundit të buxhetit të Komunës së Tetovës, mjetet për zbukurimin e qytetit për festat e fundvitit si dhe mjetet për përkrahje të projekteve në lëminë e kulturës, arsimit dhe sportit, u ridestinuan për projekte infrastrukturore në programin e sektorit për veprimtari komunale! E sa ju përket ndihmave për rastet sociale, ata miratohen në Këshillin komunal dhe paraprakisht në komisionin përkatës të Këshillit komunal. Pagesa e këtyre mjeteve bëhet në bazë të mundësive reale të buxhetit komunal, duke marrë parasysh faktin se gjatë këtyre 9 muajve të pandemisë kemi pasur probleme me gjenerimin e të hyrave komunale”, thonë nga Komuna e Tetovës.
Në qoftë për mjetet e një familjeje 11 anëtarëshe që është pa kulm mbi kokë do të duhet të pritet 18 muaj që të marrë vetëm 30 mijë denarë, atëherë mbetet e pa qartë se si Komuna e Tetovës do të sigurojë mjete për t’i gëzuar familjet me nevojë për festat e fundvitit. Ky është viti i dytë që Komuna e Tetovës nuk zbukurohet për fundvit, pasi që gjatë vitit 2019 mjetet ishin ridestinuar për të dëmtuarit nga tërmeti në Shqipëri.