Nga Samiti i NATO-s në Bruksel, udhëtoi në Bratisllavë, për të marrë pjesë në forumin “GlobSec”. E me të mbaruar këtu, me shpejtësi drejt aeroportit për t’u kthyer në Shkup.
Këtë kthesë, Ministri i Jashtëm Bujar Osmani e ndërmori që të arrijë në seancën e paracaktuar të Komisionit kuvendor për Politikë të Jashtme. Aty do të referojë për bisedimet me Bullgarinë.
Pritjen në aeroportin sllovak e shfrytëzoi për të riparë fjalimin që do ta lexojë para deputetëve.
Njëjtë edhe në aeroplanin zyrtar të Qeverisë, të cilin u detyruar ta marrë për efikasitet të kohës. Po pse kaq urgjente kjo gjë? Kryediplomati shpreson që me këtë të paktën të ndalojnë protestat e opozitares VMRO-DPMNE.
“Duke dashur që të mbyllet ky bllokim i rrugëve që po i kufizon dhe i pengon qytetarët, vendosa që të bëj këtë kthesë, të shkoj disa orë në Shkup, të referoj para Komisionit, shpresoj që të kenë mirëkuptim për këtë gjest tonin, që të jemi transparent para deputetëve por në një mënyrë edhe t’i informoj ata para se nesër të shkoj në Sofje ku do të kemi bisedimet e fundit ndoshta për këtë tentim të qershorit për të zhbllokuar proceset dhe shpresoj që pastaj ata të kenë mirëkuptim të zhbllokojnë proceset që i kanë bllokuar me ambasadorët”, tha Osmani.
Opozita maqedonase akuzon Qeverinë se negociatat mes Shkupit dhe Sofjes po bëhen në fshehtësi dhe në dëm të interesave nacionale. Osmani siguron se nëse do të ketë marrëveshje me Bullgarinë, para aprovimit të së njëjtës, do ta informojnë opozitën, e njëjtë do të bënin edhe nëse nuk ka dakordësim, por shton se e rëndësishme është që të ketë mirëbesim. Ora 15 e gjeti në Shkup. Pak minuta më vonë në Kuvend, ku tashmë Komisioni ishte mbledhur dhe po priste. Sa u përket bisedimeve, pranon se ato janë më intesive kohëve të fundit, por interesat nacionale nuk cenohen.
“Ajo që e di se është çështja më e rëndësishme për të cilën brengosen qytetarët, vlerësoj se gjithnjë kemi qenë të qartë se çështjet identitare, siç është gjuha maqedonase, veçantia etnike maqedonase, maqedonasit, nuk janë dhe nuk mund të jenë në tryezë si pjesë e bisedimeve”, u shpreh ai.
Opozitarët nga koalicioni I VMRO-DPMNE-së, i rikujtuan se ka 10 muaj që nuk është paraqitur para këtij Komisioni. Deputeti Lupço Prenxhov pyeti se pse Kuvendi nuk është i njoftuar se çfarë ka ndodhur në kontaktet diplomatike zyrtare dhe jozyrtare, për ofertat e dhëna nga zyrtarë të lartë të BE-së dhe vendet anëtare.
“E kam patjetër të theksoj dhe qartë të paralajmëroj se as ju e as një përfaqësues i Qeverisë nuk keni të drejtë legale e legjitime të flisni dhe negocioni me Bullgarinë dhe me çfarëdo shteti tjetër, ose organizatë ndërkombëtare, për çështje që lidhen me mohimin e identitetit maqedonas, historisë, vlerat tradicionale, kulturore e shpirtërore si dhe të drejtat për ekzistencën e pakicës që janë vlera themeltare e çdo shteti dhe në asnjë rast nuk guxohet të jenë në negociata politike”, tha Prenxhov.
E për çështjen me Bullgarinë, disa deputetë të VMRO-DPMNE-së, sot kanë dorëzuar deri në Kuvend disa propozim-konkluzione, ku kërkohet që Kuvendi të sjellë Rezolutë me të cilën do ta hedhë poshtë Deklaratën e miratuar në parlamentin bullgar si në kundërshtim me Marrëveshjen për fqinjësi të mirë. Në pikën e dytë kërkojnë që Kuvendi të dalë me qëndrim për nisje urgjente dhe pa kushte të bisedimeve për anëtarësim me BE-në, me kornizë e cila nuk do të mund të ngarkohet me çështje bilaterale. Ndërsa në fund kërkojnë që të vërtetohet qëndrim në të cilin çështjet e arsimit, historiografisë dhe kulturës definohen si të drejta sovrane të secilit shtet dhe se është jashtë çdo norme ndërkombëtare që të negociohet për veçantinë dhe gjenezën e gjuhës, popullit dhe vazhdimësisë historike maqedonase.