Pas 36 orëve nën rrënoja, e qara e tij e shpëtoi nga gërmadhat që i kishin rënë mbi. Aliu 1 vjeçar arriti t’u shpëtojë pasojave të tërmetit tragjik të së hënës në Turqi.
Një video tjetër prekëse është regjistruar edhe nga Siria, ku një djali të vogël i quajtur Muhammed i bllokuar nën rrënoja i jepet ujë me tapë shisheje, para se të nxirrej nga gërmadhat. Ndonëse ishte i bllokuar për 45 orë Muhammedi 2 vjeçar dukej i buzëqeshur.
“Të lumtë. Të lumtë Muhamed. Pas pak do të nxjerrim prej aty. Edhe pak ka mbetur, duro”.
E fjalët e para të një vajze tjetër të shpëtuar ishin se ka shumë ftoftë. Derisa ekipet mundoheshin ta qetësojnë duke i thënë se janë shumë afër nxjerrjes prej rrënojave.
“Kam shumë ftoftë, babi. Më janë zbardhur duart, kam shumë ftohtë. Dua të shkoj në shtëpi. Unë dua të shkoj te gjyshja ime”.
Shpresëdhënëse duket edhe videoja e një foshnje disa mujore që nxirret shëndoshë e mirë nga rrënojat.
Në Turqi dhe në Siri ende po vazhdojnë kërkimet për të mbijetuarit nga tërmeti katastrofik. Në total bilanci tragjik i viktimave në Turqi dhe Siri ka shkuar afër 10.000. Sipas informacioneve Siria regjistron të paktën 2530 viktima, ndërsa 4645 të plagosur. Kurse Turqia ka regjistruar 8.574 viktima dhe 49.133 të plagosur. Numri i viktimave pritet të rritet, ndërsa ekipet e shpëtimit janë në garë me kohën për të gjetur të mbijetuar të tjerë nën rrënoja.
Presidenti turk Rexhep Taip Erdoan vizitoi sot rajonin Kahramanmarash, më i godituri nga tërmeti. Nga aty premtoi se brenda një viti do të ndërtojnë të gjitha ndërtesat e shkatërruara në zonat e goditura. Gjithashtu bëri të ditur se disa hotele në zonën e Mersinit dhe Antalias, përfshirë qarkun e Alanyas, kanë hapur dyert e tyre për të prekurit nga tërmeti.
“Qytetarët tanë nuk duhet të shqetësohen. Ne kurrë nuk do të lejojmë që ata të qëndrojnë pa strehë. Për këtë arsye dua të bëj edhe një njoftim, momentalisht me hotelet në Antalya, Alanya dhe Mersin me hotelet bëmë takime. Nëse dikush prej juve dëshiron që të zhvendoset në këto hotele ne jemi gati t’i vendosim atje”, tha Rexhep Taip Erdogan, president i Turqisë.
Sipas të dhënave të Agjencisë për Menaxhimin e Fatkeqësive dhe Emergjencave janë ngritur gjithsej 50.818 tenda për të mbijetuarit. Në terren janë dërguar edhe 5.434 automjete, përfshirë ekskavatorë, traktorë dhe buldozerë. Tërmetet me magnitudë 7.7 dhe 7.6 ballë, epiqendra e të cilave ishte në provincën Kahramanmarash, goditën 10 provinca dhe prekën më shumë se 13 milionë njerëz.