Në Apel përfundon seanca për rastin “Alfa”, hapet rruga për rigjykim të rastit

TË FUNDIT

“Ne vetëm drejtësi kërkojmë, asgjë tjetër. Të lirohet jo vetëm Almiri, por që të tre sepse asnjëri nuk është fajtor”.

Këto ishin fjalët e nënës së të akuzuarit në rastin “Alfa”, Almir Dërplanini, pas seancës publike të Gjykatës së Apelit ku u dëgjuan ankesat e të dënuarit.

Vendimi mbi këtë ankesë i hap rrugën Gjykatës Penale që të sjell vendim për rigjykim ose jo të lëndës mbi dëshminë e re për rastin “Alfa”, ekspertizën e përgatitur në Serbi. Avokati i Dërplanin, Asmir Alispahiq, vendimin e Apelit e pret pas 1 muaji.

“Sipas përvojës dhe praktikës gjyqësore për këso lloj lënde komplekse, ku ka dënime shumë të larta, nuk pres vendim më herët se pas 1 muaji. Por sigurisht që kundrejt këtyre lëshimeve, gjykatësit të cilët vendosin, të ulen dhe t’i shqyrtojnë të gjitha kallëzimet e palëve, të prokurorisë dhe palës mbrojtëse dhe të sjellin aktvendim ligjor me çka hapet mundësia për rikthim të lëndës para gjykatës së shkallës së parë”.

Alispahiq edhe para trupit gjykues të Apelit tha se që të tre të dënuarit nuk janë kryesit e veprës penale dhe duhet të lirohen nga akuza.

“Me të vërtetë kjo lëndë është aq komplekse, aq e paqartë, aq e pakuptueshme e cila të çon deri të një qëllim i vetëm që është përsëritje e lëndës dhe lirimin e të akuzuarve. Kur them të akuzuarve, nuk mendoj vetëm për Almir Dërplanin, por mendoj edhe për Agim Islami dhe Ramadan Shaqiri”.

Në qershor të vitit të kaluar, pala mbrojtëse e të dënuarit Agim Islami, deri te Gjykata Penale dorëzoi ekspertizë forenzike të përgatitur në Serbi, ku sipas ekspertizës të dënuarit, Agim Islami dhe tashmë i ndjeri Rexhail Qerimi, janë dënuar mbi dëshmi joligjore dhe të kurdisura.

Në vitin 2010, nën akuzën për vrasjen e një polici të njësitit policor Alfa dhe plagosjen e dy prej tyre, gjykata dënoi me burg të përjetshëm tanimë të ndjerin Rexhail Qerimin, Agim Islamin, ndërsa Almir Dërplaninin u dënua në mungesë.

MARKETING I PAGUAR POLITIK