“Nata e thikave” dhe “para në shishe” këshilltarë! Osmani thotë se janë personalitete cilësore

Valentina Bozhinovska dhe Sergjan Kerim do ta këshillojnë ministrin e jashtëm, Bujar Osmanin, për politikë të jashtme. Këta dy emra u gjetën në mesin e 26 këshilltarëve në Këshillin strategjik për politikë të jashtme të cilin sot e prezantoi ministri Osmani. Por çfarë profili janë Bozhinovska dhe Kerim!? Bozhinovska në opinion u bë e njohur tek protestat para KSHZ-së në vitin 2016, me fjalimin e saj kërcënues, me çka pas dy muajve këto protesta eskaluan  me sulmin e 27 prillit në Kuvend.

 “Më pyesin çfarë po ndodhë Valentina?! Iu them se kjo natë është nata e thikave. Kjo natë është ose nata e arsyes ose e çmendurisë së një personi, tradhtarit të fundit maqedonas, Zoran Zaev”, tha Valentina Bozhinovska – anëtare e Këshillit strategjik.

Bozhinovska njihet edhe për politika antishqiptare.

 “Maqedonia po përjeton krizën e një Platforme të Tiranës, dokument i përgatitur nga një shtet fqinjë. Platformë e bërë dhe nënshkruar nga Edi Rama e vërtetuar nga Kosova dhe Hashim Thaçi. Jam thellë e bindur se edhe me Marrëveshjen kornize u prek dhe shkëput një pjesë e unitetit të Maqedonisë”, shtoi Valentina Bozhinovska.

Ndërsa Sergjan Kerim është ish-diplomat dhe ish-ministër i Punëve të Jashtme në Qeverinë e Ljupço Georgievskit. Emri Sergjan Kerim në opinion është i njohur edhe për shumë afera. Më i përfoluri ishte ai me 750 mijë euro në shishe. Sipas informatave, atëherë në veturën zyrtare të tijën, të cilën e ka drejtuar shoferi personal i Kerim, në një shishe të plastikës janë gjetur 750 mije euro në kesh. Kerim kishte mohuar përgjegjësinë për rastin i cili ka ndodhur në kufirin hungarez, për të cilën pushteti hungarez e ka alarmuar Drejtorinë e Maqedonisë për parandalim të larjes së parave.

Por ministri Osmani tha se ka zgjedhur personalitete cilësore për këtë Këshill.

 “Bëhet fjalë për personalitete cilësore, ekspertë të dëshmuar në fushat e tyre, njohës të mirë dhe me përvojë të jashtëzakonshme të aktualiteteve në diplomacisë, profesorëve, akademikëve e deri te përfaqësuesit e sektorit real siç janë biznesmenët dhe ekonomistët”, deklaroi Bujar Osmani – Ministër i Punëve të Jashtme.

26 anëtarë e këshillit paraqiten si ekspertë të fushës, ndërsa angazhimin e tyre do ta kenë në formë vullnetare. Për formimin e këtij Këshilli nuk do të ketë shpenzime në buxhet. Trupi është i përhershëm ndërsa anëtarët mundet edhe  të ndryshohen.