“Na duhet rrugë e parashikueshme drejt BE-së” – Mucunski thotë se s’ka nevojë të ndryshohet korniza për ndryshimet kushtetuese me prapaveprim

Shefi i diplomacisë, Timço Mucunski, vlerëson se nuk nevojitet që të ndryshohen konkluzionet europiane dhe korniza negociuese që të realizohet ideja për ndryshime kushtetuese me prapaveprim, për të cilat angazhohet Qeveria e re si mënyrë për zhbllokim të procesit eurointegrues. Mucunski konfirmoi se të mërkurën do të realizojë takim dypalësh me kolegun e tij bullgar, Ivan Kondov, që të bisedojnë për këtë ide. Ai i vlerësoi marrëdhëniet dypalëshe me Bullgarinë si të tensionuara dhe tha se nevojitet normalizim i tyre.

Mucunski shtoi se vendi pret një rrugë të parashikueshme drejt BE-së që nuk do të vendoset në pikëpyetje nga fqinjët. Ai e dha këtë deklaratë pas takimit me homologun e tij italian Antonio Tajani i cili është ministri parë i jashtëm i një vendi anëtar i BE-së që e vizitoi vendin tonë pas formimit të Qeverisë së re. Ai tha se zëri italian në institucionet e Brukselit është i respektuar ndërsa Roma do të vazhdojë të angazhohet që sa më shpejt që është e mundur Ballkani Perëndimor të anëtarësohet në BE.

Tajani tha se do të iniciojë takim me eurokomisarin e ri për zgjerimin e BE-së me krerët e vendeve të Ballkanit Perëndimor për të biseduar për integrim të shpejtë. Eurokomisari aktual Oliver Varheji kohë më parë njoftoi se në tetor do të mbahet Konferenca e dytë ndërqeveritare me Tiranë dhe siç shtoi, ndoshta edhe me Shkup.