Mungesa e pagave dhe pllaka e Nënës Terezë, Ministrja e re e Kulturës kërkon durim

Hysni Ismaili ia dorëzoi funksionin e ministrit të Kulturës, Irena Stefoskës nga Lidhja Socialdemokrate e Maqedonisë. Ai do të vazhdojë të jetë deputet.

Ministrja e re po merr funksionin në kohën kur debati kryesor janë mungesa e pagave në kulturë dhe gjetja e një zgjidhje ideale për pllakën përkujtimore të shenjtores Nënë Tereza. Se kur do të zgjidhet problemi me pagat e pyeti TV21 menjëherë pasi u votua si ministre në Kuvend.

 “Sa më shpejtë që do të mundem. Më lejoni nesër të shkoj në pune, t’i shoh raportet dhe kështu më radhë. Si të ju them, menjëherë pas kësaj problemi do të zgjidhet”, tha Irena Sefoska, Ministre e Kulturës.

Përgjigje të ngjashme dha edhe për pllakën përkujtimore të Nënës Terezë.

“Puna ime e parë dhe besoj se edhe e paraardhësit tim është respektimi i ligjeve dhe zbatimin e tyre do të jenë Alfa dhe Omega. Pas kësaj, më lejoni, se sot është dita ime e parë të njoftohem me të punësuarit, t’i shohim raportet, çfarë është bërë çfarë nuk është bërë, përfshirë këtu edhe deri ku është dhe në çfarë gjendje është përmendorja”, u shpreh ministrja e Kulturës, Irena Stefoska.

Ndërkaq se Hysni Ismaili nga posti u largua duke e cilësuar marrëveshjen kolektive si një nga dy pikat kyçe që i ka realizuar ai si ministër.

“Mendoj se duhet të ceken dy gjëra. Arritja e Marrëveshjes Kolektive si dhe Ligjit për Kulturë”, theksoi ish-ministri i Kulturës, Hysni Ismaili.

Me këtë marrëveshje punëtorët kulturorë do të duhej t’i kishin pagat tashmë me rritje, por kjo nuk ndodhi sepse siç janë sqaruar nga Ministria e Kulturës dhe nga Qeveria jo të gjithë drejtorët kanë dorëzuar raportet e sistematizimit në Ministrinë e Shoqërisë Informatike dhe Administratës.

“Procesi është në rrjedhë. Duhet të bëjmë analizë funksionale bashkë me raportet e reja që do të dorëzohen që të mund të përputhet sistematizimi me Marrëveshjen e re kolektive. Shërbimet e MSHIA-së janë kthyer dhe po punojnë vetëm në këtë çështje. Numrin e saktë nuk e di. Çdo ditë punohet në atë, sikurse arrijnë, i përpunojnë dhe i dërgojmë te Ministria e Kulturës”, deklaroi Damjan Mançevski, ish-ministër i Shoqërisë Informatike dhe Administratës.

Nga ana tjetër, nga Sindikata e Punëtorëve Kulturor thonë se informacionet e tyre tregojnë se 90 për qind e drejtorëve i kanë dorëzuar raportet e sistematizimit dhe nuk shohin arsye pse Ministria e Kulturës nuk i ka miratuar të njëjta veçmas, por pret raportet e të gjitha institucioneve.