Mori 10 mijë euro ryshfet, një person nën hetime për korrupsion në gjyqësor në Maqedoni

Prokuroria Themelore Publike për Ndjekjen e Krimit të Organizuar dhe Korrupsionit ka hapur procedurë hetimore ndaj një personi të dyshuar për veprën penale “Marrje shpërblimi për ndikim të paligjshëm”.

Sipas Prokurorisë, nga muaji prill deri në gusht të këtij viti, i dyshuari ka marrë 10.000 euro me qëllim që, duke shfrytëzuar ndikimin e tij të supozuar, të ndërhynte në vendime të proceseve gjyqësore civile në Gjykatën Themelore Civile Shkup dhe në Gjykatën e Apelit Shkup.

Denoncimi ka ardhur nga një menaxher kompanie, i cili si palë në një proces civil kishte marrë informacione se pala tjetër po përpiqej të ndikonte te gjyqtarët përmes ryshfetit. Për ta verifikuar këtë, ai përmes një ish-gjyqtari kishte marrë kontakt me të dyshuarin, i cili iu prezantua si person “me lidhje të ngushta me gjyqtarë në Gjykatën e Apelit Shkup”.

Në takimin e zhvilluar, i dyshuari ka kërkuar 16.000 euro, duke e bindur denoncuesin se pala tjetër kishte paguar shuma edhe më të mëdha. Pas negociatave, ata u dakorduan për pagesë me këste.

Më 30 prill, menaxheri i dha të dyshuarit 5.000 euro të para, ndërsa gjatë gjithë periudhës ata mbetën në kontakt. Më vonë, denoncuesi vendosi ta raportojë rastin dhe gjatë dorëzimit të këstit të dytë prej 5.000 euro, i dyshuari u arrestua menjëherë pas marrjes së parave.

Prokuroria sot i ka paraqitur Gjykatës Themelore Penale Shkup kërkesë për caktimin e masës së paraburgimit për të dyshuarin, duke theksuar se janë përmbushur kushtet ligjore.