Monstra, analizohen telefonat e të akuzuarve! Të akuzuarit bëjnë mbikqyrjen e raportit të MPB-së

TË FUNDIT

Ministria e Punëve të Brendshme ka përfunduar raportin e celularëve të konfiskuar nga të akuzuarit në rastin “Monstra”, ndërsa palëve të përfshira në këtë rast, sot ju dha rasti të shohin nga afër se çfarë përmbajtje ka pasur në celularët e tyre para dhe gjatë periudhës kur ka ndodhur vrasja e pesëfishtë në Liqenin e Smillkovës.

 “Nga 31 celularë të dorëzuar janë analizuar vetëm 10 prej tyre. 21 celularët e tjerë nuk është mundur të analizohen për shkak se teknikisht nuk kanë qenë në rregull dhe nuk kanë funksionuar. Përgatitja e këtij raporti ka filluar në tetor të vitit 2019 dhe ka përfunduar në shkurt të vitit 2020”, tha Ivana Petkovska – MPB.

Prej celularëve të cilëve nuk ka qenë e mundur t’i bëhet analizë ka qenë edhe ajfoni i të akuzuarit Fejzi Aziri. Ivana Petkovska nga Sektori për forenzikë digjitale pranë MPB-së shpjegoi se pse jo të gjithë celularëve nuk ka qenë e mundur t’ju bëhen analizë.

 “Fillimisht shikohet modeli dhe marka e telefonit, pastaj përmes përdorimit të softuerëve të forenzikës ekstraktohen të dhënat e telefonave celularë. Ka raste kur ndonjë model telefoni nuk ka mbështetje të softuerëve. Parregullsi tjetër teknike te një pjesë e celularëve ishte  mungesa e baterisë, pamundësia për lidhje me kompjuter, mosfunksionimi i baterisë dhe ngjashëm”, u shpreh Ivana Petkovska – MPB.

Kjo lloj analize e celularëve të të akuzuarve është bërë për herë të parë, pasi që në gjykimin paraprak nuk ishte kërkuar një gjë e tillë, theksoi gjykatësi Ognen Stavrev. Seanca e  radhës është caktuar për më 21 janar. Për vrasjen e pesëfishtë të akuzuar janë Alil Demiri, vëllezërit Afrim dhe Agim Ismailoviq, Fejzi Haziri, Haki Haziri dhe Sami Luta, ndërsa më 12 prill të vitit 2012, u vranë 4 djem të ri dhe peshkatari Borçe Stefanovski. Gjykatësi Ognen Stavrev para përfundimit të seancës ju bëri me dije palëve që të përgatiten për fjalët përfundimtare.