Garancia prej 11 milionë eurove dhe vendimi i gjykatësve Gjoko Ristov dhe Enver Bexheti i sollën liri Sasho Mijallkovit, të paktën për Vitin e Ri.
Garancia përbëhet nga prona e tundshme dhe patundshme, ndërsa ish shefi i DKS-së duhet të dalë nga paraburgimi kur të përfundojnë procedurat administrative me vendosjen nën hipotekë të pronës e cila është ofruar si garanci se ai nuk do të arratiset.
Ministri i Drejtësisë kërkon që gjykatësit e Apelit t’i shpjegojnë opinionit se si e kanë sjellë këtë vendim dhe e thirri Këshillin gjyqësor të hetojë se në cilën bazë e kanë sjellë këtë vendim që Mijallkovi të dalë nga burgu i Shutkës.
“Gjykatësit e gjykatës së Apelit në Shkup, Gjoko Ristov dhe Enver Bexheti, të cilët e sollën këtë vendim, duhet t’i shpjegojnë opinionit publik në cilën bazë e kanë sjellë këtë vendim dhe në çfarë mënyrë do të mbajnë përgjegjësi nëse ndodh përsëri rrezik për arratisje”, tha Bojan Mariçiq, ministër i Drejtësisë.
Me qëndrim doli edhe zëvendësministri i drejtësisë.
“Gjykata e Apelit le ta arsyetojë para opinionit publik vendimin për ndryshimin e masës për siguri në rastin Mijallkov dhe se si gjykatësit e kanë shfrytëzuar të drejtën e diskrecionit – bindje e lirë për vendimin e këtillë! Këshilli gjyqësor t’i marrë masat e nevojshme për ta shqyrtuar këtë procedurë të gjyqësorit që e shqetësoi opinionin publik!”, deklaroi Agim Nuhiu, zëvendësministër i Drejtësisë.
Edhe prokuroria e lartë Shkup ka dhënë mendim negativ për ankesën e Mijallkovit. Nga Këshilli gjyqësor thonë se me më shumë gjasa nesër në seancën e trupit të punës së Këshillit do të diskutohet për vendimin me të cilin është shfuqizuar masa për paraburgim.
“Këshilli gjyqësor nuk kishte mundësi sot të debatojë në lidhje me paraburgimin, por atë do ta bëjë së shpejti, me shumë gjasa nesër në seancën e trupit të punës së Këshillit. Opinioni do të informohet në kohë menjëherë sapo Këshilli gjyqësor të ketë qëndrim në lidhje me këtë çështje”, thanë nga Këshilli Gjyqësor.
LSDM-ja vendimin e gjykatës së Apelit e vlerëson si skandaloz.
“Gjykatësit Gjoko Ristov dhe Enver Bexheti publikisht të dalin dhe para opinionit publik të tregojnë se si është e mundur që për një person me dënim me burg prej gjithsej 20 viteve, të sjellin vendim të tillë? Si kanë vlerësuar se nuk ka rrezik për arratisje”, tha Bogdanka Kuzevska, zëdhënëse e LSDM-së.
Sipas VMRO-DPMNE-së ky vendim është teatër i lirë i Mariçiqit dhe LSDM-së.
“Në kushte kur shteti është në vendin e 111-të në shkallën e korrupsionit dhe është shteti më i korruptuar në Evropë, kur bëhen lista për falje sipas dëshirës së pushtetit dhe kur pushteti me instalimet e saj brenda gjyqësorit, nuk reagon për asnjë aferë dhe krim, ky është teatër i lirë i Mariçiqir dhe LSDM-së, parti të cilën e udhëheqin politikanë të korruptuar dhe është në lidhje të pathyeshme me krimin”, vlerësuan nga VMRO-DPMNE.
Ka reaguar edhe Aleanca për Shqiptarët.
“Ky rast edhe njëherë demaskoi agjendën mashtruese eurointegruese të këtij regjimi dhe legjitimoi vlerësimet tona se ky regjim duhet të bjerë një ditë e më parë. Të gjithë ata që ja zgjatën jetën këtij regjimi sot u pa se kanë kontribuar që të arrihet deri te falja e kriminelëve”, thanë nga Aleanca për Shqiptarët.
Sipas avokatit të Mijallkovit, ky vendim paraqet ngjallje të vlerave evropiane.
“Më në fund fillojnë të ngjallen vlerat evropiane në Republikën e Maqedonisë. Për shkak se një garanci aq të lartë dhe kaq kohë në paraburgim as nuk janë ofruar e as….Unë nuk e di se pse u refuzua herën e kaluar, por, ja, gjyqësori ka “veshë” për punë të këtilla dhe fillon t’i pranojë garancitë e tilla”, tha Zvonko Davidoviq, avokat.
Sasho Mijallkov është në burgun në Shuto Orizares që nga 26 shkurti i këtij viti, pasi paraprakisht disa ditë ishte në paraburgim shtëpiak. Është në paraburgim për lëndën Thesari ku u dënua me 8 vjet burg me vendim i cili nuk është i plotfuqishëm. Ai ka aktvendim i shkallës së parë edhe për rastin Target – Fortesa për të cilin është dënuar me 12 vjet burg, është akuzuar edhe për rastet “Parcelat në Vodno” dhe Titanik 2, ndërsa është dyshuar edhe në lëndën Perandoria. Në Torturë mori aktvendim lirues.