“Mickoski ka presion ndërkombëtar për Kushtetutën”, Shabani: Në janar do të dihet nëse do të ketë zgjedhje të parakohshme

Opozita akuzon se pushteti nuk ka zgjidhje konkrete për zhbllokim të procesit eurointegrues. Nënkryetari i ASH-së, krahu i Selës, Isen Shabani në Daily Click e vuri në pikëpyetje mbijetesën e qeverisë në momente kur kryeministri flet për linja të kuqe ndërsa Bullgaria nuk lëshon pe.

Nga ana tjetër Mickoski është optimist dhe thotë se do të kërkohet zgjidhje që do të garantojë se nuk do të ketë bllokada të reja për shkak të çështjeve dypalëshe.

“Do të luftojmë, nuk do të lëmë as një milimetër që të humb identiteti maqedonas dhe qytetarët e Maqedonisë, pa marrë parasysh përkatësinë e tyre etnike, sepse të gjithë ne meritojmë një të ardhme të garantuar”, tha Hristijan Mickoski, kryeministër.

Eurokomisarja e re për zgjerim, Marta Kos theksoi se do të ndihmojë që çështjet dypalëshe të mos ndikojnë në procesin e zgjerimit siç ishte në të kaluarën.

“Unë e shoh rolin tim për të ndihmuar në zgjidhjen e problemeve që kanë të bëjnë me historinë, dhe kur janë lidhur me historinë, këtu nuk ka vetëm racionalizëm por ka edhe emocione, th Kos.

Mickoski paralajmëroi se Kos së shpejti do ta vizitojë vendin tonë. Ajo paraprakisht kategorikisht tha se Kushtetuta duhet të ndryshohet, ndërsa kryeministri theksoi se e ka informuar kryesinë e re të BE-së për rrethanat dhe se krijohet një zgjidhje e mundshme.