Mexhiti: Do të votoj Qeverinë, por kam vërejtje, Zekiri: Unë thash që do të votoj për Xhaferin

“Do ta votoj qeverinë, por kam vërejtjet e mija për ekzekutivin”, kështu sot para se të hyjë në Kuvend tha deputeti i BDI-së  Izet Mexhiti.

Mexhiti ditëve të fundit është përmendur shumë për shkak të mospajtimeve në kryesinë e brendshme të partisë së tij.

I pyetur se cilat janë kritikat dhe për çka nuk pajtohet,  Mexhiti tha se ky është një debat i brendshëm i partisë.

 “Do votoj për këtë qeveri me vërejtjet personale që kam ndaj një pjese të ekzekutivit.

Është debat i brendshëm brenda Bashkimit Demokratik për Integrim, pra jam munduar sepse në vazhdimësi të kultivohet ky debat jam munduar të jem artikulues i votuesit dhe qytetarit dhe mendoj se duhet të jenë konform dëshirës dhe vullnetit të qytetarit edhe ata që përfaqësojnë ekzekutivin mendoj që kjo do ti ndihmon Bashkimit Demokratik për Integrim”, tha Izet Mexhiti, deputet i BDI-së.

Edhe deputeti Arben Ziberi tha se debat brenda partisë ka, por nuk ka ndonjë problem.

 “Ka pasur debat, unë e thash edhe atë ditë, BDI është parti demokratike, nuk ka asnjë problem, ne do të vazhdojmë me punën e Kuvendit. Sot siç edhe e dini në rendë dite është zgjedhja e nënkryetarëve të parlamentit”, theksoi Arben Ziberi, deputet i BDI-së.

Gjatë hyrjes në kuvend deputeti i LSDM-së Muhamed Zeqiri foli për votimin nga ana e tij për Talat Xhaferin kryeparlamentar.

 “Unë thash që do ta votoj dhe e përmenda se do e votojmë njeriun i cili ka amnistuar”, u shpreh Muhamed Zekiri, deputet i LSDM-së.

Meqenëse propozimi është që të zgjidhen 5 nënkryetar, Elmi Aziri nga koalicioni ASH-AAA, tha se kjo nuk përputhet me tendencën e kryeministrit për t’i shkurtuar shpenzimet publike.

 “Mbrëmë dëgjuam se do të propozohen 5 deri tash ka qenë praktikë 4 faktikisht ka çështje që duhet të diskutohen. Mendoj që nuk përputhet me tendencën e kryeministrit për ti shkurtuar pozicionet për ti shkurtua shpenzimet publike”, potencoi Elmi Aziri, deputet i Aleancës për Shqiptarët.

Në seancën e sotshme konstatohen edhe mandatet e deputetëve të tërhequr.