Mërgimtari nga Kërçova në hall me mbeturinat, dikush ja hedh para oborrit, ka 10 vjet që kërkon zgjidhje

Mbeturina të llojeve të ndryshme, erë e keqe. Si të mos mjaftonte kjo për tua humbur gjurmët ato digjen shpesh, me çka edhe kundërmon erë e rëndë. Kjo është gjendja para shtëpisë së një mërgimtari në lagjen “Ali Kurtaj” në fshatin Greshnicë të Kërçovës. Ai ka 10 vite që përballet me mbeturina të cilat hidhen me traktor nga banorët e fshatit gati çdo ditë dhe aty është krijuar deponi.

 “Problemi jonë këtu është afër shtëpisë së vëllait tim ka 10 vite që po përballemi me problemin e mbeturinave, disa herë ka intervenuar vëllai tek komuna e Kërçovës por, për fat të keq ka 10 vite. Nuk ka asnjë aksion, gjendja është e  mjerueshme. Ka pasur dëme dhe pasoja, këtë verë kur vëllai erdhi në pushime djali i vëllait u helmua nga një mizë, erës së keqe dhe ajri është shumë i ndotur”, tha Ali Alimi-mërgimtar.

Ata vetë e kanë parë traktorin dhe janë munduar ta ndalojnë me çka kanë pasur edhe mosmarrëveshje.

 “Dje në këtë vend këtu ku gjendemi tash takova një fshatarin tonë me traktor me mbeturina me mbetje ndërtimore, më vjen keq se u kacafytëm me fjalë dhe u kthye sërish me traktorin nuk e di se ku e hodhi “, pohoi Ali Alimi-mërgimtar.

Ai tregon se për ta zgjidhur këtë problem ka trokitur në të gjitha dyert institucionale por, që nuk ka marrë asnjë premtim për zgjidhjen ose pastrimin e kësaj deponie mbeturinash. E së fundmi ai ka qenë sërish tek kryetari Komunës së Kërçovës Fatmir Dehari nga ku ka marr këtë përgjigje.

 “Kryetari Komunës më tha do ta marrim do ta shohim sepse kemi një organizim për të bërë një fabrikë në Komunën e Kërçovë, por këto fjalime janë të vjetra gjithmonë thonë po po do të rregullohet por vazhdon e njëjta situatë “, tha Ali Alimi-mërgimtar.

TV21 kërkoi qëndrim nga NP “Komunalec” Kërçovë. Nga atje thonë se me situata të tilla përballen gati në çdo fshat të Komunës së Kërçovës.

“Jemi të njoftuar me rastin në fjalë dhe siç e dini ne si ndërmarrje nuk menaxhojmë me mbeturinat në disa fshatra, por si në shumë raste tjera edhe këtu do të veprojmë sa më shpejtë të jetë e mundur. Kemi sjellë makineri të re për përballimin e mbeturinave dhe po montohet, kemi në plan që deri për vitin e ri të dalim në teren edhe nëpër fshatra. Po mundohemi të mbajmë çdo vend të pastruar por deponi të atilla krijohen sërish nga vetë banorët”, theksojnë nga NP ”Komunalec” Kërçovë. 

Mërgimtarët të revoltuar thonë se ata vijnë në vendlindje për të pushuar, ndërsa këtu përballen me problem nga më të ndryshmet.