Me takim liderësh Zaev mund ta debllokojë Kuvendin! Mickoski ofron kuorum për ligjet që kanë të bëjnë me krizën

Nëse koordinatorët e grupeve parlamentare nuk mund të gjejnë zgjidhje për zhbllokimin e Kuvendit, atëherë do të ulemi të bisedojmë ne liderët e partive politike, tha kryeministri Zoran Zaev. Ai shtoi se nesër do të mbajë takim me kryetarin e Kuvendit, Talat Xhaferi, që të mësojë detajet se çka ndodhë brenda në Kuvend dhe në bazë të asaj të gjejnë edhe zgjidhje.

 “Të premten janë pyetjet e deputetëve në Kuvend. Unë do të mbaj takim me kryetarin e Kuvendit, me shumë gjasa edhe me kryetarin e BDI, që të shqyrtojmë mundësitë e mundshme që i kemi në dispozicion për të zhbllokuar Kuvendin. Të gjitha mundësitë janë të hapura, që nga takimi i liderëve deri te koordinatorët e grupeve parlamentare për të gjetur zgjidhje, gjithçka që të lirojmë institucionet të marrin vendime që janë jetike për popullin tonë”, tha Zoran Zaev – kryeministër i Maqedonisë së Veriut.

E dje, Skender Rexhepi, koordinatori i grupit parlamentar të ASH-së dhe AAA-së, tha se nuk sheh arsye se përse ligji për shtetësi nuk zgjidhet në Kuvend, ndërsa nëse çështja shkon deri në takim liderësh, atëherë nuk do të mbetën vetëm me kërkesën për ligjin për shtetësi.

 “Çdo nen është i ndryshueshëm, çdo nen ka hapësirë për një qasje të sinqertë dhe të barabartë, por megjithatë urdhëroni të ulemi dhe të gjejmë zgjidhje të përbashkët. Unë besoj se mund të zgjidhet në Kuvend nëse ka gatishmëri, nëse nuk ka gatishmëri në Kuvend, takimi liderësh apo instancat më të larta do të marrin përmasa krejt tjera të cilat nuk do të mbetën më vetëm me ligjin për shtetësi, por do të marrin shumë çështje tjera përpara”, u shpreh Skender Rexhepi nga koalicioni ASH-AAA.

Ndërkohë sot kreu i VMRO-DPMNE-së Hristijan Mickoski ftoi kryetarin e Kuvendit që nesër të vendose në rend dite katër ligjet që lidhen me krizën duke ofruar kuorum në Kuvend për miratimin e tyre.

1.Vendimi për vazhdimin e gjendjes së krizës për shkak të virusit korona

2.Ndryshimet në ligjin për mbështetje financiare të punëdhënësve.

3.Mbështetje financiare për personat fizik që janë të vetëpunësuar dhe janë goditur nga kriza. Dhe 4.Ndryshimet në ligjin për tatimin e të ardhurave personale”, shkruan kryetari i VMRO-DPMNE-së, Hristijan Mickoski.

Mes tjerash Mickoski ka shtuar se qytetarët nuk duhet të mbahen peng nga një qeveri e paaftë.

Ndryshe tashmë disa ditë Kuvendi është i bllokuar, ndërsa një nga arsyet është  vendimi i opozitës shqiptare ASH-AAA që përmes amendamenteve të bllokojnë çdo ligj, derisa nuk gjendet zgjidhje për personat pa shtetësi.