Me shumë gjasa zgjedhjet lokale më 17 tetor, kryeministri tërhiqet nga propozimi për shtyrje deri në 31 tetor

TË FUNDIT

VMRO-DPMNE-ja nuk e ka ndërmend të bëj pazar me datën e zgjedhjeve lokale, u shpreh mbrëmë kreu i partisë opozitare Hristijan Mickoski, duke shtuar se kjo është çështje e definuar me Kushtetutë.

“Nëse Kushtetuta thotë se mandati i kryetarëve dhe këshillit është 4 vjeçar, atëherë pas 4 vitesh ne duhet ta kemi rrethin e parë për zgjedhjet e kryetarëve dhe këshilltarëve. Kështu që kjo nuk duhet të jetë temë për politikë ditore, Kushtetuta është e qartë, ashtu siç është, e thërras Kryetarin e Kuvendit, Talat Xhaferin që t’i shpallë zgjedhjet ashtu siç definohet me Kushtetutë”, tha Mickoski.

Kreu socialdemokrat, kryeministri Zoran Zaev lëshon pe për datën. Paraprakisht pat propozuar datën 31 në vend të 17 tetorit, ndërsa tani thotë se edhe kërkesa e opozitës është e rëndësishme.

“Për mua është shumë e rëndësishme se çfarë do të thotë opozita rreth datës së zgjedhjeve, jo për ne. E folëm 31 tetorin, unë e kumtova, tash shoh ka pakënaqësi tek opozita. Hap prapa, menjëherë! Opozita duhet të jetë e kënaqur edhe me datën e zgjedhjeve. Pse themi jo data 17, por me ligj të prolongohen, për shkak se përkon fushata e zgjedhjeve me regjistrimin e popullsisë dhe kjo nuk është mirë”, tha Zaev.

Nëse për 17 tetorin bien dakord edhe partitë e tjera, Zaev tha se për të është “ok”. Sa u përket subjekteve të tjera politike, zëdhënësi i Bashkimi Demokratik për Integrim, Bujar Osmani dje bëri të ditur se për ta është e pranueshme çfarëdolloj date dhe se integristët nuk do të ndërhyjnë në bisedimet mes partive politike. Data e zgjedhjeve nuk përbën problem as për koalicionin Aleanca-Alternativa, megjithatë dje deputeti Skënder Rexhepi tha se janë të qëndrimit se duhet të mbahen më 17 tetor, në përputhje me Kushtetutën dhe ligjet.

TË NGJAJSHME