Me 62 voto PRO dhe asnjë kundër u votua Ligji për regjistrimin e Popullsisë. Për ligjin votuan deputetët e shumicës LSDM, BDI, BESA, ndërsa nga opozita votuan deputetët e koalicionit ASH-AAA, derisa VMRO-DPMNE nuk mori pjesë në votim.
“Konstatoj se me 62 vota PRO, Kuvendi ka votuar për ligjin për regjistrim, amvisërisë dhe pasurisë”, deklaroi Xhaferi.
Paraprakisht koordinatori i grupit parlamentar të VMRO-DPMNE-së Nikolla Miceski hodhi dyshime për regjistrimin duke u ankuar për nënshkrimin e dyfishtë në mes Drejtorit dhe Zv/Drejtorit në Entin Shtetëror për statistika.
“Ditëve të fundit po licitohet me përqindje dhe pranimin ose mospranimin e rezultateve nga regjistrimi që duhet bërë. Kjo më jep të drejtën të konstatoj se vërejtjet tona janë të arsyetuara dhe se ne mesin e shumë vërejtjeve është edhe nënshkrimi i lidhur i drejtorit dhe zv/drejtorit ka njëfarë roli në këtë zgjidhje ligjore dhe se regjistrimi nga operacion statistikor kalon në operacion politik”, tha Micevski.
Menjëherë përgjigje për këtë i dha Kryetari i Kuvendit Talat Xhaferi, i cili tha nënshkrimet e dyfishta kanë dalë si rezultat i marrëveshjes së Përzhinës.
“Në lidhje me nënshkrimin e lidhur, është pasojë e Përzhinos. Tani ju lutëm, nuk mund të vini këtu të akuzoni e pastaj të mos dëgjoni. Nënshkrimi i lidhur, nënshkrimi i lidhur! Është prodhim dhe shpikje e Përzhinos jashtë institucioneve”, shtoi Xhaferi.
Në foltore doli edhe deputeti i koalicionit ASH-AAA, Skender Rexhepi. Ai shprehu shqetësimin se përse shumica po ngutet për ta hedhur ligjin në votim.
“E shoh që shumicës i ngutet për të sjell këtë ligj, por ne nuk ngutemi. Ne duam që opinioni t’i sheh këto fakte se çfarë ka ndodhur në ditët e kaluara në lidhje me ligjin për regjistrim. Kryetar Xhaferi, ju ishit dëshmitarë se grupi jonë parlamentar ishte në Kuvend, por deri ora 13.30 në Kuvend nuk kishte asnjë as nga opozita e as nga pushteti. Ju jeni dëshmitar se në ora 13.40 iu thirra dhe më thatë se nuk do të ketë seancë jeni të lirë të shkoni”, deklaroi Rexhepi-Zejd.
Regjistrimi i popullsisë është paraparë të realizohet nga 1 deri më 21 prill. Regjistrimi i fundit ne Maqedoni është bërë në vitin 2002. I radhës duhej të bëhej në 2011 por i njëjti dështoi, gjë për të cilën ka edhe lëndë në gjykatë. Zakonisht regjistrimet në shtete bëhen në 10 vite.