“Me kujdes të menaxhohet me 6 miliardë eurot”/Norma efektive e interesit për kredinë britanike nuk do të jetë nën 5%

Kredia britanike prej 6 miliardë eurosh nuk mund të ketë normë efektive interesi më të ulët se 5 për qind. Këto janë pritjet e ekspertëve të theksuara në emisionin “Biznes 21”. Deri më tani nuk ka pasur detaje rreth kushteve dhe se sa para shtesë do të kthehen për normë interesi, përveç deklaratës së kryeministrit Mickoski, i cili pret që norma e interesit të jetë më e ulët se 4,5%, dhe asaj të zëvendëskryeministrit Nikolloski, rreth 3,5%. Por njohësit paralajmërojnë – kur të mblidhen të gjitha kostot e përgjithshme të kredisë, ajo nuk do të jetë më e ulët se 5%.

“Për pjesën e shfrytëzuar të kësaj kornize kreditore që do ta marrim, ne do të jemi diku me 5 deri në 5,5%, po spekuloj, në nivelin e normave mesatare të interesit.

-Për 6 miliardë euro, 5% interes, për 10 vite, me periudhë grejs, sa do të ishte kjo?

-Përafërsisht prej 60 deri në 100 milionë euro – varet, tani mund vetëm të spekuloj.

-Interesi vjetor do të ishte ai?

-Nuk mund të jap tani shifra të sakta”, tha Sinisha Naumovski, profesor universitar.

“Plasimi i atyre parave në Maqedoni sjell rrezik. Maqedonia nuk është në të njëjtin rang me Britaninë sa i përket rrezikshmërisë në pranimin e mjeteve të huaja, dhe është e qartë se një rrezik i tillë do të shtohet në përllogaritjen e normës efektive të interesit. Për të formuar normë efektive interesi, mendoj se nuk do të jetë më pak se 5%. Kur them këtë, pres që të jetë edhe më e lartë”, tha Pavlle Gacov, ekspert tatimor.

Ekspertët paralajmërojnë të jemi të kujdesshëm me shpenzimet. Thonë se duhet të krijojmë vlerë të shtuar, rritje të BPV-së, që të mund t’i kthejmë paratë. Paralajmërojnë që të bëhet kujdes me borxhin publik të vendit, I cili tani është 57,7% të BPV-së, apo detyrimi është 9,6 miliardë euro.

“Korniza është enorme. Korniza që po e krijojmë tani është afër 45%  të kapacitetit të përgjithshëm të BPV-së”, shtoi Pavlle Gacov, ekspert tatimor.

Naumoski njoftoi se ka informacion se do të ketë edhe marrëveshje të tjera dypalëshe të këtij lloji.