As shiu nuk i ndali që të provojnë se nëse është hapur leximorja e bibliotekës “Shën Klimenti i Ohrit”. Por, dera qëlloi e mbyllur.
Studenti Arben Memeti kishte ardhur të provojë nëse është hapur leximorja, sepse donte të mësonte aty, pasi po përgatitet për provimet që i ka në rrjedhë.
“Siç e patë edhe vetë, sot biblioteka e universitetit është jofunksionale dhe kjo paraqet një nevojë për studentët që të hapet, në bazë të protokollit të caktuar ku do të parashihet edhe distanca. Është e nevojshme kjo për neve. Për arsye se e kemi afatin e provimit dhe tash është më se e nevojshme se në fillim të vitit në fakultet për arsye se të gjithë studentët janë mësuar të mësojnë në bibliotekë”, tha Arben Memeti, student.
Me Arbenin ishte edhe kolegu i tij Umejr Muamedi. Ai thotë se gjithçka tjetër u hap në shtet, prandaj edhe leximoret s’ka më logjikë të qëndrojnë të mbyllura.
“Duke marrë parasysh se tash janë hapur të gjitha kafenetë, pra gjithçka funksionon sipas protokolleve të caktuara, mendojmë se edhe bibliotekat duhet të funksionojnë njëjtë dhe e presim një protokoll që do të respektohet nga studentët”, tha Umejr Muamedi, student.
Që të dy vlerësojnë se moshapja e leximoreve për studentët do të ndikojë edhe në rezultatin e provimeve, pasi siç thonë studentët të cilët vitet e kaluara kanë kaluar nga tre provime gjatë afatit të verës, këtë afat kanë paraqitur vetëm nga një provim.
Hapjen e leximoreve pas gjysmës së dytë të qershorit, e kishte paralajmëruar ministri i Kulturës, Hysni Ismaili në emisionin “10 Minuta”. Sot nga kabineti i tij për TV21 thanë se protokolli është realizuar, por pritet vlerësimi nga Komisioni për sëmundje ngjitëse.
“Propozim- protokolli nga të cilat do të hapen institucionet nacionale, përfshirë edhe bibliotekat, tashmë është dorëzuar në Komisionin e Sëmundjeve Ngjitëse prej ku pritet përgjigje”, tha Ministria e Kulturës.
Hapja e leximoreve është hapi i parë i rihapjes së institucioneve kulturore në vend, pasi të njëjtat u mbyllën që nga 10 marsi si masë e parandalimit të Kovid-19.